ڕاگەیەندراویPAK بە بۆنەی بەڕێوەچوونی سەرکەوتوانەی مانگرتنی گشتیی لە کوردستان

24/11/2022

ڕاگەیەندراویPAK بە بۆنەی بەڕێوەچوونی سەرکەوتوانەی مانگرتنی گشتیی لە کوردستان

وەک چاوەڕوان دەکرا ئەمڕۆ ٣ ی سەرماوەزی ٢٧٢٢ ی کوردی، نەتەوە کۆڵنەدەرەکەمان لە رۆژهەڵاتی کوردستان، بە حەول و تێکۆشانی هاوکاتی چالاکانی تاک و کۆی ناوخۆ، حیزبە سیاسییەکان، چالاکانی سۆسیالمیدیا و پاڵپشتیی ڕۆڵەکانی کوردستان لە دەرەوەی وڵات و گواستنەوەی لە لایان میدیاکانەوە، مانگرتنێکی گشتیی دیکەی بەڕێوە برد.
ئەم مانگرتنە گشتییە، هەنگاوێکی دیکەی خەڵکی کوردستانە لە ڕەوتی ڕاپەڕینی ڕاماڵینی داگیرکەر لە نیشتمان و کۆتاییهێنان بە سەروەریی ناڕەوای ئێران. هاوکات وەڵامێکی یەکگرتووانەیە بە لەشکرکێشی تاران بۆ شارە ڕاپەڕیوەکان و کوشتاری ڕۆڵەکانی کوردستان لە سەر شەقامەکان و هێرشە درۆنی و هاژەکییەکانی بۆ سەر هێزەکانی پێشمەرگە و بنکە و بارەگاکانی پارتە سیاسییەکانی ڕۆژهەڵاتی کوردستان.
پارتی ئازادیی کوردستان ، بەبۆنەی ئەم سەرکەوتنەوە پیرۆزبایی و سڵاوی خەبات و کۆڵنەدان پێشکەشی ڕۆڵەکانی نەتەوەکەمان و هەموو کوردستانیانی مانگرتوو و ڕاپەڕیو دەکات.هاوکات تێڕامان لە  بێدەنگە لێکردن و بە دەنگەوە نەهاتنی کوردستان لەم مانگرتنەدا لە لایان گرووپەکانی ئۆپۆزیسیۆنی فارس لە دەرەوەی وڵات کە خۆیان بۆ ڕۆنیشتن لە جێی خامنەیی و دارودەستەکەی خۆش کردوە، بۆ ڕۆڵەکانی کوردستان و نەتەوە بندەستەکانی دیکەی ئێران بە پێویست دەزانێت. پارتی ئازادیی کوردستان ئەو بێدەنگی و بەدەمەوەنەهاتنە مانادارەی ئەو گرووپانە مەحکووم دەکات.
پارتی ئازادیی کوردستان وەک بەشدار و پاڵپشتی لێبراوی ڕاپەڕینی رۆڵەکانی کوردستان، تێدەکۆشێ و هیوادارە کە  ڕۆڵەکانی کوردستان بە بەشداریی هەرچی زیاتر و بەرینتریان لە خۆپیشاندانەکان و پووچەڵکردنەوەی پلان و پەلامارەکانی هێزەکانی رێژیم، دەرفەتی کۆنتڕۆڵکردنەوەی شەقامەکان و گەڕەکەکان بە هێزە داگیرکەرەکانی ئێران نەدەن و پارێزگاریی لە خوێن و خەباتی سێ مانگەمان بکەن.
سەرکەوێ ڕاپەڕینی ڕاماڵینی داگیرکەران و کۆتایهێنان بە سەروەریی ئێران لە سەر کوردستان.

پارتی ئازادیی کوردستانPAK
٣ سەرماوەز ٢٧٢٢ک
٢٤ نۆڤامبری ٢٠٢٢ز