ڕاگەیەندراوی ژمارە( 92 )ی ڕاپەڕینی کوچک و بەردی رۆژهەڵاتی داگیرکراو "ڕاپەڕین تا ڕاماڵینی داگیرکەران لە نیشتمان"

06/12/2022

ڕاگەیەندراوی ژمارە( 92 )ی ڕاپەڕینی کوچک و بەردی رۆژهەڵاتی داگیرکراو
"ڕاپەڕین تا ڕاماڵینی داگیرکەران لە نیشتمان"

خەڵکی ڕاپەڕیوی رۆژهەڵات بە بەڕێوەبردنی سەرکەوتووانەی مانگرتنی گشتیی، سەروەریی و حوکمی داگیرکەرانەی ئێرانی بەسەر کوردستانەوە رەتکردەوە.
هەروەک وەک چاوەڕوانمان دەکرد  ئەمڕۆ ۱٥ ی سەرماوەزی ٢٧٢٢ ی کوردی، جەماوەری ڕەپەڕیو و نەتەوە کۆڵنەدەرەکەمان لە رۆژهەڵاتی کوردستان، لە درێژەی هەڵوێست و تێکۆشانی پڕ ڕەنگ و جۆراوجۆری خۆیاندا مانگرتنێکی گشتیی دیکەی بەڕێوە برد.
ئەم مانگرتنە گشتییە، کە شارەکانی سنە، مەهاباد، ئابدانان،سەراوڵە، ئیلام، کامیاران، قەسری شیرین، ئیزە، دیواندەرە، کرماشان، قوروە، بجنورد، ورمێ، پاوە و گشت دەڤەرەکانی گرتەوە؛ هەنگاوێکی دیکەی خەڵکی کوردستانە لە ڕەوتی ڕاپەڕینی ڕاماڵینی داگیرکەر لە نیشتمان و کۆتاییهێنان بە سەروەریی ناڕەوای ئێران. هەروەها وەڵامێکی یەکگرتووانەیە بۆ پووچەڵکردنەوەی پیلان و سیاسەتی فریوکارانەی ڕێژیم کە بە دانی هەندێ بڕیار وەک هەڵوەشاندنەوەی پۆلیسی بەناو ڕەوشت ، ویستی کۆتایی بە ڕاپەڕین و خۆپیشاندانەکان بهێنێ، بەڵام خەڵکی ڕاپەڕیوی کوردستان بەو هەڵوێستە، جیاوازی پرس و ویستەکانی خۆی دووپاتکردەوە.
هەروەها خەڵکی سەربەرزی مەهاباد لە چلەی شەهیدانی ئەو شارەدا، لەسەر گڵکۆی شەهیدانی راپەڕین کۆبوونەوە و خاوەندارێتییان لە خوێنی سەرجەم شەهیدانی راپەڕین کرد.
دڵنیاین سبەی 16ی سەرماوەز، نەتەوەکەمان، بە رابوون و هاتنەوە شەقامەکان، بەیەکێتی و یەکڕیزییەوە ، نایەکی گەورە بەتاران و ڕێژیمی کۆماری ئیسلامی دەڵێتەوە و هەر بە پێشەنگی خەبات دەمێنێتەوە.

پارتی ئازادیی کوردستان PAK
کۆمیتەی راگەیاندن
١٥ سەرماوەز ٢٧٢٢ک
٦ دیسامبر ٢٠٢٢ز