ڕاگەیەندراوی ژمارە( 94 )ی ڕاپەڕینی کوچک و بەردی رۆژهەڵاتی داگیرکراو "ڕاپەڕین تا ڕاماڵینی داگیرکەران لە نیشتمان"

13/12/2022

ڕاگەیەندراوی ژمارە( 94 )ی ڕاپەڕینی کوچک و بەردی رۆژهەڵاتی داگیرکراو
"ڕاپەڕین تا ڕاماڵینی داگیرکەران لە نیشتمان"

شەوی ڕابردوو هێزە داگیرکەرەکانی بەر فەرمانی تاران لە درێژەی تاوان و دەستدرێژی و هەڵکوتانە سەر ژیان و ماڵی خەڵک و ڕفاندن و بێسەروشوێن کردنی ڕۆڵەکانی کورد، بەشێوەیەکی دڕندانە هەڵیان کوتایە سەر ماڵی مامۆستا سەیفوڵڵا  حسەینی، لە شاری جوانڕۆی خۆڕاگر.
 مامۆستا سەیفوڵڵا کە مامۆستایەکی دیاری ئایینی و یەکێ لە گەورە پیاوانی کوردە و لەسەر بڵینگۆی مزگەوتی " خاتەمول ئەنبیا" ی شاری جوانڕۆ لە ئاداب و رسوومی کوردەواری دەدوا و خاوەنی هەڵوێستێکی نیشتمانی و دلێرانەیە و لە حاست تاوان و جینایەتەکانی دەوڵەتی داگیرکەر دەنگی هەڵبڕیبوو؛ شەوی رابردوو لەلایان هێزەکانی دەوڵەتی داگیرکەر هێرش دەکرێتە سەر ماڵەکەی و لە کاتی ڕفاندنیدا، ئەوپەڕی بێڕێزی بەخۆی و  هاوسەر و بنەماڵەکەی دەکرێ و دەستی خاتوون قادریی هاوسەری ژیانی دەشکێندرێ.
جێی ئاماژەیە  پاش ڕفاندن و دەستبەسەرکردنی ،مامۆستا سەیفوڵڵا، ڕەوانەی  ئیدارە و گرتووخانەی ئیتلاعاتی کرماشان دەکرێ و ئێستا بێسەرو شوێنە و هیچ زانیارییەک لەسەر ژیانی نییە.
پارتی ئازادیی کوردستان، هەڵوێستی کوردانەی مامۆستا سەیفوڵڵا و هەموو ئەو مامۆستایانەی تر کە دەگەڵ ڕۆڵەکانی نەتەوەکەمان ماونەتەوە و پشتیان لە خەڵک نەکردووە، بەرز دەنرخێنێ. هاوکات هێرش بۆ سەر مامۆستایانی ئایینی و گرتن و بێڕێزیی پێیان بەتوندی مەحکوم دەکا و داواکارە لە ڕۆڵەکانی نەتەوەکەمان کە پشتیوان و پارێزەری مامۆستایان و نوخبە پێشنگەکانی کۆمەڵگە بن کە خاوەنی هەڵوێستی کوردانە و پشتیوانی ڕۆڵە ڕاپەڕیوەکانی کوردستانن .
هەروەها ئەو ڕاستییە ڕادەگەیەنینەوە کە تەنیا دەوڵەت و سەروەریی نەتەوەیی دەتوانێ، دانیشتوانی کوردستان لە ھێرش و کوشتار بپارێزێت.
پارتی ئازادیی کوردستان PAK
کۆمیتەی راگەیاندن
٢٢ سەرماوەز ٢٧٢٢ک
١٣ دیسامبر ٢٠٢٢ز