لێدوانی پانخوازانه، خزمه‌تی یه‌کڕیزیی و ته‌بایی پارته ‌سیاسییه‌کان ناکات!

20/12/2022

لێدوانی پانخوازانه، خزمه‌تی یه‌کڕیزیی و ته‌بایی پارته ‌سیاسییه‌کان ناکات!
 
له دەسپێکی ڕاپه‌ڕینی کوردستانەوە، زیاتر له جارێکه هێندێک له به‌رپرسانی حیزبه‌کانی ناوه‌ندی هاوکاریی، لە دەرکەوتن و لێدوانه میدیاییه‌کانیاندا، به هه‌ناسه‌یه‌کی ته‌سکه‌وه، کۆی خۆپێشاندان و مانگرتنه‌کانی ڕۆژھەڵاتی کوردستان، له‌سه‌ر بانگه‌وازی خۆیان و به ده‌سکه‌وتی خۆیان داده‌نێن. 
له کاتێکدا ڕاپه‌ڕینی ڕۆژهه‌ڵاتی کوردستان، زیاتر له هه‌رکاتێکی دیکه پێویستی به ته‌بایی و ڕێککه‌وتن و چێ‌کردنی یه‌کڕیزی و کاری به‌ره‌یی نێوان کۆی پارت و لایه‌نه سیاسییه‌کانی ڕۆژهه‌ڵات ھەیە؛ ئه‌م هه‌ناسه‌یه ‌و ئه‌و جۆره لێدوانانه، خزمه‌ت به‌و پێویستیی و پڕۆسه‌یه و دێموکراتیزە کردنی پێوەندیی نێوان پارتە سیاسییەکان، ناکه‌ن و ده‌بنه مایه‌ی ڕکه‌به‌ری و ناکۆکیی.
ڕاپه‌ڕینی ڕۆژهه‌ڵاتی داگیرکراو که بە شەهیدکرانی ژینا ئه‌مینی چه‌خماخه‌ی لێدرا؛ ڕاپه‌ڕینێکی خۆڕسکی پشت‌به‌ستوو به که‌لتووری چوار دەیه خه‌بات و به‌ربه‌ره‌کانی له‌گه‌ڵ تارانە. له ڕه‌وتی ڕاپه‌ڕیندا، هه‌رکام له پارت و لایه‌نه‌ سیاسییه‌کانی ڕۆژهه‌ڵاتی کوردستان لەوانە ناوەندی ھاوکاریی، به پێی توانا و پێگەی خۆیان، ده‌ور دەگێڕن. ڕووداوه‌کانی سه‌رشه‌قام و گەڕەکەکانی نیشتمان، پلانه تیرۆریستییه‌کان و هێرش و پیلانگێڕیی تاران دژی هه‌رکام له پارته‌سیاسییه‌کان، ئاوێنه‌ی ده‌ورگێڕانی هه‌ر پارتێکی سیاسی له‌و ڕاپه‌ڕینه‌دایه. لە گەڵ ئەوەشدا PAK لەسه‌ر ئه‌وباوه‌ڕه‌یه که حیزب و لایەنە سیاسییه‌کان، ته‌نیا ئاکتۆری ڕۆڵگێڕان له بزاڤ و ڕاپه‌ڕینی ڕۆژهه‌ڵات نین؛ به‌ڵکوو له تەنیشت حیزبه‌کان؛ تۆڕێکی پان و بەرین لە چالاکانی توێژ و کەرتە جۆراوجۆرەکانی ناوخۆ و دەرەوەی وڵات؛ گرووپ و ئەنجوومەنەکان و ئەندامانی تۆڕه‌کۆمه‌ڵایه‌تییه‌کان و میدیاکان؛ خاوەن دەورن.
پارتی ئازادیی کوردستان له پێناو پێکھێنانی به‌ره‌یه‌کی یه‌کگرتووی کوردستانی درێژە به گفتوگۆ و ھاوکاریی له‌گه‌ڵ ناوه‌ندی هاوکاری و پارته‌کانی دیکەی ڕۆژهه‌ڵاتی کوردستان ده‌دات.‎

پارتی ئازادیی کوردستانPAK
٢٩ی سەرماوەزی٢٧٢٢ک
٢٠ی دیسامبری٢٠٢٢ ز