ڕاگەیەندراوی ژمارە( 97 )ی ڕاپەڕینی کوچک و بەردی رۆژهەڵاتی داگیرکراو (ڕاپەڕین تا ڕاماڵینی داگیرکەران لە نیشتمان)

31/12/2022

ڕاگەیەندراوی ژمارە( 97 )ی ڕاپەڕینی کوچک و بەردی رۆژهەڵاتی داگیرکراو
(ڕاپەڕین تا ڕاماڵینی داگیرکەران لە نیشتمان)
ئەمڕۆ ١٠ بەفرانباری ٢٧٢٢، لە چلەی شەهیدانی جوانڕۆدا، خەڵکی ئازا و چاونەترسی جوانڕۆ، بە بەرز راگرتنی یادی شەهیدان و هاتنەوە سەر شەقام و گۆڕەپانەکان خاوەندارێتییان لە رابوونی پڕشکۆیان و خوێنی شەهیدانی نیشتمان کرد.
رۆڵە چاونەترسەکانی جوانڕۆ، سەرەتا بەکۆبوونەوەیان لەسەر گڵکۆی شەهیدانی راپەڕین و دواتر بە رژانەسەر شەقام و کۆڵانەکان درێژەیان بە راپەڕینی ١٠٦ رۆژەیان دا.
هێزەکانی دەوڵەتی داگیرکەر، بە دامەزراندنی قەناس بەدەستەکانیان لەسەربانەکان، تەقەی ڕاستەوخۆ و پەلاماردانی خەڵکی راپەڕیو و  بەکارھێنانی گازی فرمێسک رێژ  حەولی بڵاوەپێکردن و دامرکاندنەوەی راپەڕینەکان دەدەن. لە ئاکامی ئەم پەلامارانەدا ژمارەیەک لە کچ و کوڕانی ئازای نیشتمان شەهید و برینداربوون.
خەڵکی ئازا و قارەمانی جوانڕۆ لەبەرانبەر پەلاماری دەوڵەتی داگیرکەری ئێراندا راوەستاون و دیفاعی رەوا لە خۆیان و راپەڕین دەکەن. ھەر ئێستا لە ھێندێک لە گەڕەک و شەقامەکانی شاردا،شەڕ و تێکهەڵچوون لەنێوان خەڵکی راپەڕیو و هێزەداگیرکەرەکانی ئێران لە ئارادایە.
هاوکات ئەوڕۆ لە شارەکانی کرماشان، سەرپێڵی زەهاو و سنە، خەڵکی ئەو شارانە بە هاتنەوەسەر شەقامەکان، بەردەوامییان بە بەرخۆدانی قارەمانانەیان دا.
سەرەنجام ڕاپەڕینی رۆژهەڵاتی داگیرکراو، کۆشک و تەلاری دەوڵەتی داگیرکەر، دەڕمێنێ و لە بست بە بستی خاکی نیشتمان رایاندەماڵێ.
پارتی ئازادیی کوردستان PAK
کۆمیتەی راگەیاندن
١٠ بەفرانباری ٢٧٢٢ ک
٣١ دیسامبری ٢٠٢٢ ز