ئاگاداریی هەواڵگری و ئاسایشی سپای میللیی کوردستان لە مەڕ خولێکی دیکەی حەول و تەقەلاکانی دامودەزگا تێرۆریستیەکانی ئێران

06/01/2023

ئاگاداریی هەواڵگری و ئاسایشی سپای میللیی کوردستان
لە مەڕ خولێکی دیکەی حەول و تەقەلاکانی دامودەزگا تێرۆریستیەکانی ئێران
کوردستانیانی خۆشەویست!
هەڤاڵانی پێشمەرگە؛خەباتگێڕانی رێگای ئازادیی و سەربەخۆیی کوردستان! 
پاش ئەوەی دوژمنی داگیرکەر نەیتوانی بە هێرشی هاژەکی و درۆنی بۆ سەر پێشمەرگەخانە و پێگەکانی سپای میللیی کوردستان، بە ئاکامی دڵخوازی خۆی بگات و خۆڕاگریی و ئێرادەی فەرماندەیی و کچان و کوڕانی ریزەکانی سپای میللیی کوردستان، تەنیا ریسوایی و قورستر بوونی باری تاوانەکانیانی بۆ هێشتوونەتەوە ؛ داموودەزگا سیخوڕی و تێرۆریستیەکانی دەوڵەتی داگیرکەری ئێران خولێکی دیکەی حەول و تەقەلایان بۆ درووستکردنی تاک و تۆڕی سیخوڕی و پیلانگێڕی و دەنگۆسازی میدیایی دژی سپای میللیی کوردستان، دەست داوەتێ. 
لە سێ دەیەی رابردوودا رێبوارانی رێگای رزگاری و سەربەخۆیی کوردستان بە هاوکاری «دڵسۆزانی ونی ئەم رێبازە» ، زەبری گورچووبڕیان لە مەکینەی سیخوڕی و تێرۆر و تاوانی دەوڵەتی داگیرکەر سرەواندووە و زۆربەی پیلان و تەقەلاکانیان پووچەڵ کراونەتەوە . ئێستایش تێکشکاندنی ئەو حەول و تەقەلایانەیان هەروەک رابردوو وریایی و چاوتیژی و گوێ سووکی و جووڵەی خێرای هەمووانی گەرەکە . 
بۆیە هەواڵگری و ئاسایشی سپای میللیی کوردستان وێڕای سپاس و پێزانین بۆ هەموو ئەو هاونیشتمانی و هەڤاڵانەی ئەم یەکەیەیان لە جووڵەکانی دامودەزگا سیخوڕی و تێرۆریستییەکانی ئێران ئاگادارکردووە؛ داوا لە هەموو رۆڵە دڵسۆزەکانی نەتەوە و نیشتمانەکەمان لە ناوەوە و دەرەوەی وڵات و ریزەکانی سپای میللیی کوردستان و لە هەرێمی کوردستان دەکات، بە وردبینی و چاوکراوەیی و هەستیارییەوە سەرنج بدەنە هەر رووداو ، جووڵە ، پەیوەندی و هەڵسووکەوتێک کە جێگای گومان بێت و رەنگ و بۆنی پیلان و حەوڵی ئەو دام و دەزگایانەی دوژمنی لێ بێت و بە خێرایی و بێ دواکەوتن ، هەواڵگری و ئاسایشی سپای میللیی کوردستانی لێ ئاگادار بکەن.
پێکەوە بە دڵسۆزی و پشت بە خۆبەستن و پابەندیی بە بەها و بایەخە نەتەوەیی و ئەخلاقی و شۆڕشگێڕییەکان، هەموو پیلانەکانی دوژمنانی ئازادیی و سەربەخۆیی کوردستان تێک دەشکێنین .
سپای میللیی کوردستان 
یەکەی هەواڵگری و ئاسایش 

15ی بەفرانباری 2722 کوردی
5ی ژانویەی 2023 زایینی