پارتی ئازادیی کوردستان، گرتنی مامۆستایانی ئایینی مەحکووم دەکات

30/01/2023

پارتی ئازادیی کوردستان، گرتنی مامۆستایانی ئایینی مەحکووم دەکات

لە درێژەی تاوان و جینایەتەکانی دەوڵەتی داگیرکەری فارس دژی ڕۆڵەکانی کوردستان، ئەمڕۆ دووشەممە ١٠ی رێبەندانی ٢٧٢٢ کوردی، مامۆستا ئیبراهیم کەریمی نەنەڵە" مامۆستای مزگەوتی ئاوایی نەنەڵە و "مامۆستا لوقمان ئەمینی" مامۆستای ئایینی «مزگەوتی چوار یاری نەبی» شاری سنەیان لە رێگای نێوان مەریوان- سنە دەسبەسەرکرد و بۆ شوێنێکی نادیاریان راگواستوون. پێشتریش پۆلێک مامۆستای ئایینی کە لە پڕۆسەی ڕاپەڕینی ڕاماڵینی داگیرکەردا بەشدار ببوون و ئامادە نەبوون تاوانی داگیرکەران پاساو بدەن، گیراون و زیندانی کراون.
پارتی ئازادیی کوردستان وێڕای مەحکوم کردنی گرتن و بێسەروشوێنکردنی مامۆستایانی تێکۆشەری ئایینی، پێ لەسەر ئەو راستییە دادەگرێتەوە کە ھەتا سەروەریی ئێران بەسەر نیشتمان و نەتەوەکەمانەوە بەردەوام بێت، ژیان و گیان و ئاسایش  و ماف و ئازادیی تاک و کۆی رۆژهەڵاتی کوردستان لە بەر ھەڕەشە و ھێرشدا دەمێنێتەوە و دابین بوونی ھەر کام لەو بەھایانە لە گرەوی ئازادی و سەربەخۆیی کوردستان‌دایە.

پارتی ئازادیی کوردستان PAK
١٠ رێبەندانی ٢٧٢٢ کوردی
٣٠ ژانوییەی ٢٠٢٣ زایینی