لە ڕۆژی جیهانیی کرێکاردا، لە پێناو ئازادیی و یەکسانی و دادپەروەرییدا

پێش 4 هەفتە

لە ڕۆژی جیهانیی کرێکاردا، لە پێناو ئازادیی و یەکسانی و دادپەروەرییدا

     باری دابەشکردنی کوردستان و ئەو تەرتیباتەی کە کوردستانی کردووەتە کۆڵۆنییەکی نێودەوڵەتیی، لە هەمووان زیاتر بە کۆڵ کرێکاران و زە‌حمەتکێشانی کوردستانەوەیە. هەر بۆیە بەرژەوەندیی سەرەکیی کرێکاران و زەحمەتکێشانی کوردستان وەک باقی چین و توێژەکانی کوردەواریی، کۆتاییهێنان بە دۆخی کۆڵۆنی و داگیرکراویی نیشتمانەکەمانە.
    چاوخشاندنێک بە مێژوو و ئەزموونی نەتەوەکان دەریدەخەن کە پێشکەوتن و بەختەوەری تاک و چین و توێژەکانی کۆمەڵگاکان بە هەبوونی سەرەوەریی نەتەوەییەوە دەست پێدەکات. ئەو نەتەوانەی خاوەن دەوڵەتن و دەوڵەتەکانیان بە سیستەمی بە هێز و پێشکەوتوو و دێموکراتییک بەرێوە دەبرێن، ڕێژەیەکی بەرزی ئازادیی و داد و بەختەوەریی و مافیان بۆ تاک و گرووپە کۆمەڵایەتییەکان لەوان چینی کرێکار، دابین کردووە.
لە لایەکی دیکەوە، پرسی ناسنامەی نەتەوەیی و ڕووبەڕوو بوونەوە و بەربەرەکانێ لە گەڵ هێزی لەشکریی داگیرکەر و سیاسەتی ئیستیعماریی ئابووریی و تێکدانی باری دێموگرافی و لێدانی بەها کۆمەڵایەتییەکان و دەسمایەی کۆمەڵایەتیی و پڕۆژەی ئاسمیلاسیۆن و زبانکوژیی داگیرکەر، وەک پرسیەلی بان چینایەتیی، هاوبەستیی کرێکاران و زەحمەتکێشانی کوردستانی لە گەڵ هەموو کەرتە کۆمەڵایەتییەکانی دیکە لێدەکەوێتەوە و لە کۆتاییدا وەک نەتەوەیەک لە نیشتمانێکی هاوبەش بۆ تێکەوەپێچانی تەرتیباتی کۆڵۆنیالیستیی، تێدەکۆشن.
   لەم بۆنەیەدا داخ و کەسەری قووڵ لە بارودۆخی دژوار و ئەو تەنگانە تاقەت پڕووکێنە دەردەبڕین کە کرێکاران و زەحمەتکێشانی ڕۆژهەڵاتی کوردستان، لە ژێر حکومڕانیی دەوڵەتی داگیرکەری فارسدا، تووشی هاتوون و لە پێناو پاروە نانێکی نەمرنەژییدا یان ڕێگای هەندەران دەگرنە بەر یان دۆخی کۆڵبەرییان بەسەردا سەپێندراوە.
رۆژی جیهانیی کرێکار بۆ پارتی ئازادیی کوردستان، ئەو بۆنەیەیە کە هاندەرە بۆ شێلگیریی و بەردەوامیی لە خەبات لە پێناو  داماڵینی نیری دەوڵەتی داگیرکەری فارس لە سەر نیشتمانەکەمان و گەیشتن بە سەربەخۆیی و یەکسانی و دێموکراسیی و دادپەروەریی و ژیانی شایانی مرۆڤ.

پارتی ئازادیی کوردستانPAK
١١ی گوڵانی ٢٧٢٣ک
١ی مایسی ٢٠٢٣ز