راگەیەندراوی پارتی ئازادیی کوردستان دەوڵەتی داگیرکەر بەردەوامە لە تاوان

پێش 2 هەفتە

راگەیەندراوی پارتی ئازادیی کوردستان
دەوڵەتی داگیرکەر بەردەوامە لە تاوان
بەرەبەیانی ئەمڕۆ هەینی 29ی گوڵانی 2723 ک، دەوڵەتی داگیرکەری ئێران بە ئێعدامی سێ لاوی نیشتمانەکەمان، تاونێکی دژی مرۆڤیی دیکەی خوڵقاند. 
 شەھیدانی ئەمڕۆی دەستی دەوڵەتی داگیرکەر شۆڕە لاوانی نەمری بنارەکانی زاگرۆس، نەوەکانی سەردار ئەسعەد و بی مەریەم و شێرعەلیمەردانخانی بەختیاریی:«مەجید کازمی»،«ساڵح میرهاشمی» و«سەعید یەعقووبی» بە تاوانی بەشداریی لە ڕاپەڕینی ژینا و دەنگھەڵبڕین بۆ چوونە دەرەوەی داگیرکەران لەسەر خاک و نیشتمان، لە بێدادگاکانی کۆماری ئیسلامییدا، حوکمی ئێعدامیان بەسەردا سەپا بوو.
 گرتن و لەسێدارەدانی رۆڵەکانی بەختیاری، درێژەی تاوان و جینایەتەکانی سەت ساڵەی دەوڵەتی داگیرکەری فارسە لە ناوچەکانی باشووری رۆژهەڵات لە پێناو بەردەوامیی سەروەریی ناڕەوا و تاڵانی سامانی نەتەوەیی و بەئێرانیی کردنمان.
دەبا تێکەڵبوونی خوێن و خەباتی ڕۆڵەکانی ئەم نیشتمانە لە ماکۆوە ھەتا لوڕستانات، بکەینە ھەوێنی یەکبوونی نەتەوەیی کورد و لوڕ  و وەک نەتەوەیەکی بەھێز، بەرەنگاری سیستەمی کۆڵۆنیالیستیی ئێران ببینەوە و سەروەریی فارس بەسەر خاکی زاگرۆسەوە نەھێڵین و بە سەربەخۆیی نیشتمانیی و نەتەوەیی کۆتایی بە کوشتاری ڕۆڵەکانمان بێنین و ئاسایش و بەختەوەرییان بۆ دابین بکەین.
پارتی ئازادیی کوردستان هاوکات داوا لە کۆمەڵگای نێودەوڵەتیی بە دەوڵەتان و رێکخراوە و کۆڕ و کۆمەڵەکانەوە دەکات، لە حاست تاوانەکانی دەوڵەتی داگیرکەری فارس بێدەنگ نەبن و بۆ ڕاگرتنی شەپۆلی کۆشتاری ڕۆڵەکانی ئەم نیشتمانە، دەوڵەتی ئێران، بخەنە ژێر گوشارەوە.
پارتی ئازادیی کوردستان PAK
کۆمیتەی راگەیاندن
29ی گوڵانی 2723 کوردی
19ی مای 2023 زایینی