پەیامی بزووتنەوەی نەتەوەیی کوردستان بە بۆنەی ۳۰ی گوڵان ساڵڕۆژی دامەزراندنی پارتی ئازادیی کوردستان

پێش 2 هەفتە

پەیامی بزووتنەوەی نەتەوەیی کوردستان بە بۆنەی ۳۰ی گوڵان ساڵڕۆژی دامەزراندنی پارتی ئازادی کوردستان
۳۰ی گوڵان ساڵڕۆژی لە دایکبوونی پارتی ئازادی  کوردستان و گوتاری سەروەری سیاسیی نەتەوەیی پیرۆز بێت
لە کاتێکدا هەوری ڕەشی نائومێدی و خۆبەدەستەوەدان بەسەر کەش و هەوای سیاسی ڕۆژهەڵاتدا سەپابوو و وەیشوومەی ئێرانچێتی لوولەلوولی بوو، لەو تاریکەشەوەدا ئەستێرەیەکی پڕشنگدار وەکوو ڕێنوێنێکی مێژوویی و بە پێچەوەنەی بارودۆخەکە و بەوپەڕی هەست بە بەرپرسیارێتی مێژوویی بە پێچەوەانەی ڕەوتی خۆبەکەمزانین درەوشایەوە و گوتاری سەربەخۆییخوازی و سەروەری سیاسی هێنا ناو گۆڕەپانی سیاسی ڕۆژهەڵاتەوە.
ئەو ئەستێرەیە و خاوەنی ئەم گوتارە، شۆڕەلاوێکی دم بەپێکەنین و دموچاوێکی لێوالێو لە خۆشەویستی نیشتمان و سەوداسەری ڕزگاری نەتەوەکەی و دڵێکی پڕلەهیوا بە دواڕۆژی نیشتمان، کاک سەعید یەزدانپەنا بوو کە یەکێتی شۆڕشگێڕانی کوردستانی ئەم دەم و پارتی ئازادی کوردستانی ئەمڕۆی دامەزراند. مەخابن دەستی ڕەشی تیرۆڕی کۆماری ئیسلامی ئەو بڵیمەتەی زۆرزوو لێمان ستاند بەڵام هاوبیران و درێژەدەرانی لەناو حزبەکەی و لەدەرەوەی حزبەکەشیدا ڕێگا و ڕێبازیان بزر نەکرد و بە ڕوونی ئەمڕۆ دەبینین ئەو گوتارە لەناو ناخی خەڵکی کوردستاندا جێی خۆی کردووەتەوە و لە دروشمی داگیرکەری ئێرانی خۆی دەنوێنێتەوە. ئەمەکداری بۆ کاک سەعید و ڕێبازەکەی و حزبەکەی ئەرکی هەموو سەربەخۆییخوازێکە کە ئەمڕۆ بەلامانەوە زۆر ئاساییە باسی سەربەخۆییخوازی دەکەین لە کاتێکدا لەسەردەمێکدا بێجگە لە کاک سەعید و هەڤاڵانی کەس نەیدەوێرا باسێکی وا بکات و بەترس و لۆمەوە خۆیان وەک ئێرانی پێناسە دەکرد.
دیسانەوە پیرۆزبایی لە هەموو خەڵکی کوردستان و هەموو سەربەخۆییخوازان و پێشمەرگە و ئەندام و کادیر و ڕێبەرایەتی پارتی ئازادی کوردستان دەکەین و خۆمان بە درێژەدەری ئەم ڕێبازە دەزانین و ڕێزدەگرین لەناو و ڕێبازی کاک سەعید یەزدانپەنا ڕێبەری نەمری بزووتنەوەی نەتەوەی کوردستان و ڕەوتی سەربەخۆییخوازی و سەروەری سیاسی بۆ کوردستان.
بزووتنەوەی نەتەوەیی کوردستان
۳۰ی گوڵانی ۲۷۲۳ی کوردی