سزای داگیرکەر بۆ مامۆستایانی ئایینی خەڵاتی نیشتمانپەروەری و حیسابی چاکەیە

17/06/2023

سزای داگیرکەر بۆ مامۆستایانی ئایینی خەڵاتی نیشتمانپەروەری و حیسابی چاکەیە

رۆژی چوارشەممە ١٧ جۆزەردانی ٢٧٢٣ ک، دەوڵەتی داگیرکەری فارس، کۆمەڵێک سزای بەسەر هەردوو مامۆستای ئایینیی«مامۆستا  لوقمان ئەمینی» و «مامۆستا ئیبراهیم کەریمی نەنەڵە» داسەپاند.
١١ – ١٢ ساڵ بەندکردن و دوورخستنەوەیان لە زێدی خۆیان و لێستاندنەوەی کارەکەیان بۆ هەمیشە ئەو سزا داسەپاوانەن.
ئەو دوو مامۆستا ئایینییە لەوانە بوون کە بە ئاوێتە کردنی بەھا ئایینییەکان و بەھا نیشتمانییەکان ببوونە ڕێڕەوی مەکتەبی شێخی نەھری و پێشەوای شەھید و بە دەنگھەڵبڕین لە حاست کوشتنی ژینا و ڕۆڵە ڕاپەڕیوەکانی نیشتمان، نەریتی ھەڵوێست گرتنی نەمران مامۆستا کەریمی شاریکەندی و مامۆستا محەممەدی ڕەبیعی/یان گەشاندەوە.
پارتی ئازادیی کوردستان پیرۆزبایی لە ھەردوو مامۆستای بەند کراوی بەندی داگیرکەر دەکات. چوونکە سزای دەوڵەتی داگیرکەر بۆ ئەوان، ھەم بە خەڵاتی نیشتمانپەروەریی دەژمێردرێت و ھەم بە چاکە دێتە ژمار لە بارەگای ئیلاھیی. ئەوان بە ھەڵوێستەکانیان لە ڕاپەڕینی ژینادا و بەم خەڵاتە، ڕێگای ئیمانداریی خۆیان ھەم لە ئاخوندە نوقمبووەکانی فسق و فجووری کۆماری ئیسلامی جیاکردەوە و ھەم لە ھێڵی تاقمە تێرۆریستییەکان.
کوردستان و دەوڵەتی داگیرکەر لە دەیان بەستێن و بواردا لە ململانێی نێوان ئازادیی و بەردەوامیی سیستەمی کۆڵۆنیال دان. ئاسایش و بەختەوەریی کوردستانیان تەنیا بە سەرکەوتنی ئازادیی و ڕمانی کۆڵۆنیالیزمی ئێرانیی وەدیی دێت.

پارتی ئازادیی کوردستانPAK
27 جۆزەردانی 2723 ک
17 ژووەن 2023ز