سەردانی کۆمەڵەی زەحمەتکێشانی کوردستان لە پارتی ئازادیی کوردستان PAK

پێش 2 هەفتە

سەردانی کۆمەڵەی زەحمەتکێشانی کوردستان لە پارتی ئازادیی کوردستان PAK

نیوەڕۆی ئەوڕۆ پێنجشەممە ٢٣ی خەرمانانی ٢٧٢٣ کوردی،  شاندێکی کۆمەڵەی زەحمەتکێشانی کوردستان بە سەرپەرشتیی بەڕێز رەزا کەعبی و بەشداریی ژمارەیەک لە ئەندامانی سەرکردایەتی و کادێرانی ئەو حیزبە، سەردانی پارتی ئازادیی کوردستانیان کرد.
شاندی میوان لەلایان بەڕێز حسەین یەزدانپەنا سەرۆک و ژمارەیەک لە ئەندامانی سەرکردایەتی و تێکۆشەرانی ریزەکانی PAK پێشوازییان لێکرا.
لەم دیدارەدا وێڕای ئاڵوگۆڕی بیروڕا لەسەر بارودۆخی سیاسیی کوردستان و ناوچەکە، لەسەر چارەسەرکردنی قەیرانە حیزبییەکان لە رێگای دروست و خۆبواردن لە توندوتیژی و حەولدان بۆ بەهێزکردنی گیانی تەبایی و هاوکاریی و هەنگاوهەڵگرتنەوەی بەکردەوە بۆ بەدامەزراوەیی کردنی هاوکاریی نێوان حیزبە سیاسییەکان و پێویستیی بە بنەماگرتنی پرەنسیپی مافی دیارییکردنی چارەنووس و کوردستانی‌بوون و کوردستانتەوەری، پێداگیرا.
هەردوولا هەڵوێستی هاوبەش و هاوهەڵوێستیی حیزب و لایەنە سیاسییەکانی رۆژهەڵاتی کوردستانیان بۆ بانگەوازی مانگرتنی گشتیی بەبۆنەی ساڵوەگەڕی گیانبەختکردنی ژینا ئەمینی ، بە هەنگاوێکی گرینگ دانا و لەگەڵ بەردەوامیی ئەم جۆرە هەنگاوانەدا بوون.
لە تەوەرێکی دیکەی چاوپێکەوتنەکەدا پرسی رێککەوتننامەی ئاسایشیی نێوان ئێران و عێراق و هەڕەشەکانی ئێران بۆ هێرش و لەشکرکێشیی خرایە بەرباس.
هەردوولا هاوڕابوون لەسەر ئەوەی ھاوکاریی و ھاواھەنگیی لایەنەکانی رۆژهەڵات بۆ بەربەرەکانی لەگەڵ ئەو هەڕەشانە و دانانی رێوشوێنی گونجاو بۆ پووچەڵکردنەوەی پیلانگێڕییەکانی تاران پێویستە.
بابەتی پێوەندیی دوولایەنەی نێوان پارتی ئازادیی کوردستان و کۆمەڵەی زەحمەتکێشان و بەهێزکردنی گوتاری نەتەوەیی کوردستانی، تەوەرێکی دیکەی ئەو دیدارە بوو.

پارتی ئازادیی کوردستان PAK
کۆمیتەی راگەیاندن
٢٣ی خەرمانانی ٢٧٢٣ کوردی
١٤ ی سێپتامبری ٢٠٢٣ زایینی