راگەیەندراوی سپای میللیی کوردستان سەبارەت بە هێرشی درۆنی سپای پاسداران بۆ سەر هەسەدە

06/02/2024

راگەیەندراوی سپای میللیی کوردستان
سەبارەت بە هێرشی درۆنی سپای پاسداران بۆ سەر هەسەدە

  بەرەبەیانی رۆژی ١٦ی رێبەندانی٢٧٢٣کوردی، رێکەوتی ٥ فێورییەی ٢٠٢٤ زایینی، گروپە بەکرێگیراوەکانی سەر بە هێزی قودسی سپای پاسدارانی ئێران لە ناوچەکانی ژێردەسەڵاتی سووریاوە، لە رێگەی درۆنەوە هێرشێکیان کردەسەرئاکادیمیای پەروەردەی هێزەکانی کۆماندۆی هەسەدە لە نزیک کێڵگەی نەوتیی عومەر لە رۆژهەڵاتی دێرەزوور.
لە ئاکامی هێرشی بەکرێگیراوانی هێزی قودسی سپای پاسداران، ٦ رۆڵەی کوردستان لە ریزەکانی شەڕڤانانی هێزەکانی سووریای دیموکرات، شەهیدبوون.
ئێران بە پێکهێنان، ئاراستەکردن و فەرماندەیی دەیان هێزی بەکرێگیراو لە ڕۆژهەڵاتی ناوەڕاست ڕێکخەری سەرەکیی تێرۆر و ناسەقامگیری و خوڵقێنەری شەڕ و خوێنڕێژییە لە هەموو ئەو وڵاتانەی کنەی تێ کردوون. 
سپای میللیی کوردستان وێڕای هاوخەمیی لەگەڵ بنەماڵەی شەهیدانی ئەو هێرشە تێرۆریستییە، لەسەر پێویستیی تێکشکاندنی هەموو گرووپە بەکرێگیراوەکانی بەرفەرمانی ئێران و رادانی هێزەکانی سپای قودس لە هەموو ئەو وڵاتانەی کە پێگەیان لێ دامەزراندووە، پێدادەگرێ و ئامادەیی خۆی بۆ بەشداریی لەو پڕۆسەیە، دەردەبڕێ.
یەکەکانی سپای میللیی کوردستان لە رۆژانی ١٩_٢٦ ی ئۆکتۆبری ٢٠١٧ز، شانبەشانی هێزەکانی حکومەتی هەرێمی کوردستان، دەوری گرینگیان لە تێکشکاندنی هێرشی سپا و گرووپەکانی بەرفەرمانی ئێران لە عێڕاق، بۆ داگیرکردنی هەولێر گێڕا.

سپای میللیی کوردستان SMK
فەرماندەیی گشتیی
 ١٧ی رێبەندانی ٢٧٢٣ کوردی
 ٦ی فێورییەی ٢٠٢٤ زایینی