دواین هەواڵ

2024-04-21 خۆکوژیی بەندکراوێکی ڕاپەڕینی ژینا 2024-04-21 سۆما پوورمحەممەدی، مامۆستای زمانی کوردی بە ١١ ساڵ بەندکران و دوورخستنەوە حوکم درا 2024-04-20 بەرپرسێکی پلە بەرزی ئەمریکی: فڕۆکەیەکی ئیسراییلی بە سێ هاژەک پێگەی راداری پەدافەندی ئاسمانیی ئێرانی لە نزیک ئەسفەهان تێکشکاند 2024-04-14 کوژرانی دوو کۆڵبەری کورد بە تەقەی راستەوخۆی هێزەکانی دەوڵەتی داگیرکەری ئێران 2024-04-05 هونەرمەند عەلی زەندی کۆچی دوایی کرد 2024-04-01 کوژرانی ژمارەیەک لە فەرماندە باڵاکانی سپای پاسدارانی دەوڵەتی داگیرکەری ئێران 2024-03-28 پەیامی سەرۆکیPAK بە بۆنەی ١٠ی خاکەلێوە و سێزدەبەدەری کوردستان: 2024-03-27 کوردستان چۆن نەوڕۆژی خۆی لە نوروز ئێرانیی جیا کردەوە؟ 2024-03-27 ئاواتی نەتەوەکەمان و ئەرکی ھێزە سیاسییەکانی ڕۆژھەڵاتی کوردستان: 2024-03-24 هونەرمەند حەسەن کاکایی بەهۆی خوێندنی سروودی نەتەوەیی، لەلایان هێزەکانی بەرفەرمانی تارانەوە دەسبەسەرکرا 2024-03-23 کۆڵبەرێک لە سنووری نەوسوود بەتەقەی هێزەکانی دەوڵەتی داگیرکەر، کوژرا 2024-03-16 ناوی سەردارانی شەھیدی لوڕستان ھەرمانە و تاوانی دەوڵەتی فارسیش لەبیر نەکراو 2024-03-16 پەیامی نەورۆزیی بەڕێز حسەین یەزدانپەنا سەرۆکی PAK: 2024-03-16 پێشمەرگەیەکی کۆمەڵەی شۆڕشگێڕی زەحمەتکێشانی کوردستانی ئێران تیرۆر کرا 2024-03-15 کۆڵبەرێکی کورد ٩ رۆژ دوای بریندارکرانی گیانی لەدەست‌دا

ڕاگەیەندراو

بانگەوازی پارتی ئازادیی کوردستان PAK بۆ تەحریمی چالاکانەی هەڵبژاردنەکانی 11ی ڕەشەمەی دەوڵەتی داگیرکەر

13/02/2024

 

بانگەوازی پارتی ئازادیی کوردستان PAK
بۆ تەحریمی چالاکانەی هەڵبژاردنەکانی 11ی ڕەشەمەی دەوڵەتی داگیرکەر

ڕۆڵەکانی نەتەوەی کورد لە ڕۆژهەڵاتی کوردستانی داگیرکراو ! 
   تاران جارێکی دیکە هەموو تواناکانی خۆی خستووەتە گەڕ بۆ ئەوەی رۆژی یازدەی ڕەشەمە، شانۆگەرییەکانی هەڵبژاردنی مەجلیسی شۆرای ئیسلامی و مەجلیسی خۆبرەگان بەڕێوە بەرێت.
ئەزموونی ١٠٠ ساڵەی دەوڵەتی فارس و 45 ساڵی سیستەمی کۆماری ئیسلامیی، سەلمێنەری ئەو ڕاستییەن کە هەڵبژاردنەکانی ناو ئەم دەوڵەتە هێندێک شانۆگەریی و عۆینبازیی سیاسیین کە نە فڕیان بەسەر پڕەنسیپی هەڵبژاردنەوەیە، نە هیچ پێوەندییەکیان بە ڕێزدانان و بەهێندگرتنی ویست و دەنگی خەڵکەوە هەیە. بەڵکوو چ لە شێواز و چ لە ناوەڕۆکدا گاڵتەجاڕییەکی پڕ فرت و فێڵ و کۆت و بەند کراوی بەڕێوبەرانی دەوڵەت و سیستەمی سیاسییە کە دواتر بە جێگۆڕکێ و هەڵکشان و داکشانی نێوان ژمارەیەک لە دەست و پێوەندە سوێند خواردووەکانی«عولیاحەزرەت» و«حەزرەتی ئیمام» و«موقامی موعەزەم»، بۆ بەڕێوەبردنی دەوڵەتێکی کۆلۆنیالی و سیستەمێکی دیکتاتۆر و تۆتالیتێر، کۆتاییان هاتووە. 
   ئەوەندەی بۆ کوردستان دەگەڕێتەوە، بابەتەکە ئامانج و تایبەتمەندیی جیاوازی تێدایە. کاربەدەستانی دەوڵەتی داگیرکەری فارس تێدەکۆشن بە ڕکێش کردنی خەڵکی کوردستان بۆ سەر سنووقەکانی شانۆگەریی هەڵبژاردن، پێوەندیی ڕاستەقینەی نێوان تاران و کوردستان کە بریتییە لە پێوەندی نێوان داگیرکەر و داگیرکراو، پشارنەوە. تاران تێدەکۆشێ کوردستان وەک بەشێکی ئاسایی لە "ئێران" و کورد وەک هاوناسنامەی، نەتەوەیەکی ساختە بە ناوی "ملت ایران" لەناو قەوارەی دەوڵەت، پیشان بدات.
  لەگەڵ هەموو ئەو ئامانج و نیاز و تایبەتمەندییانەی کە هەڵبژاردن لەناو ئەو دەوڵەت و سیستەمەدا هەیەتی، لە شانۆگەرییەکانی ئەمجارەدا، تاران خۆی لە مەبەست و نیاز و پلانێکی گەورەی دیکە مەڵاس داوە کە بریتییە لە: سڕینەوەی وێنەی گەورەترین ڕاپەڕینی 45 ساڵی ڕابردووی کوردستان و نەتەوەکانی بندەستی ئێران؛ ڕاپەڕینی مەزنی ژینا ! 



ڕۆلەکانی کوردستانی زامدار!
   تاران تێدەکۆشێ و بۆی گرینگە بە ڕازییکردن یان بە زۆر بردنی ئێوە بۆ سەر سنووقەکانی ئەو شانۆگەرییانە، شانازیی لێدانی چەخماخە و پێشەنگایەتیی ڕاپەڕینی ژینا، لە کوردستان بستێنێتەوە. تاران حەول دەدات بەو شانۆگەرییانە دیوێکی پێچەوانەی دیمەنەکانی حەماسەی سەرشەقامەکان لە ڕاپەڕینی ژینادا، پیشانی جیهان و لایەنگرانی بدات. تاران بە تەمایە بە دەرکەوتنی ئێوە لە پای سنووقەکانی دەنگدان، شکۆی کچەکانمان کە سینگیان کردە قەڵغانی فیشەکی دوژمن و کوڕەکانمان کە بە عەشقەوە لە مەرگ نەدەسڵەمینەوە، بشکێنێ. تاران دەیهەوێ، ناو و ناوبانگ و دیمەنەکانی ئەو ڕاپەڕینە مەزنە لە زەینی گەلان و دەوڵەتانی جیهاندا بشواتەوە و لە جێگایان دیمەنی دەستەمۆ بوونمان پیشان بدات. بەڵێ؛ تاران دەیهەوێ بەمجۆرە بەهاکانی کۆڵنەدان و بەرەنگاریی و هەستان و گلان لە ڕۆڵەکانی بنارەکانی «دێنا»،«زەردەکوو»،«داڵانکوو»،«کەوەرکوو»،«مانێشت»،«پەڕاو»، «شاهۆ»،«کۆساڵان»،«ئاویەر»،«ئاربابا»،«وەنەوشە»،«تەرەغە»،«هەڵگورد» و «ئاگریی»، بستێنێتەوە!
  بۆیە،ئەوانەی لەم نیشتمانە زامدارەوە، خۆیان بۆ بەشداریی لە مەجلیسەکانی داگیرکەر کاندید کردووە، دەبێ بزانن لەو گەوەڕەی بۆی دەچن، دەبێ پاشاخوڕی فەرماندەکانی سپای پاسداران و تێرۆریستەکانی وەزارەتی ئیتلاعات کاوێژ بکەنەوە. ئەوانەش کە دەچنەسەر سنووقەکان وبەشداریی ئەو هەڵبژاردنانە دەکەن، دەبنە ئامڕازی پیلان و ئامانجەکانی تاران؛ دەبنە هاودەستی ئەوانەی فیشەکیان بە سینگی کوڕان و کچانی نیشتمانەکەمانەوە ناوە؛ دەبنە هاودەستی ئەوانەی تەنافی داریان خستووەتە ملی لاوانی بە دیل گیراومان؛ دەبنە هاودەست و هاودڵی ئەو پاسدارانەی درۆن و هاژەکیان بە بارەگاکان و ماڵی پێشمەرگەوە نا و کوڕە ئازاکانیان لە خوێن گەوزاندین و ژن و منداڵی ساوایان کوشتین.
بەڵێ؛ بەشداریی لەو شانۆگەرییانەدا ،کولاندنەوەی هەموو ئەو زام و برینانەیە؛ گۆڤەند گێڕانە لەسەر گڵکۆی شەهیدەکان و شەهیدە گۆڕ غەریب و گۆڕ نادیارەکانمان.تەنیا هەڵبژاردن و دەنگدانێ بۆ کوردستانیان پیرۆز و جێگای شانازییە کە ڕێفراندۆمی دیاریی کردنی چارەنووسیی سیاسیی کوردستان بێت. 
 دەبا لە بەختیاری و لوڕستاناتەوە هەتا ئیلام و کرماشان، لەوێوە بۆ ئەردەڵان و هەورامان و موکریان هەتا قەڵای چارییە و خۆراسان؛ بە بەشداریی نەکردن و تەحریمی شانۆگەرییەکانی 11 ڕەشەمە، پەیامی کۆڵنەدان و خەبات لە ڕێی ڕزگاریی خاک و ئەستاندنی ئازادیی و سەربەخۆیی، بە ڕووی تاران و گشت جیهاندا بدەینەوە و ڕۆحی شەهیدانی راپەڕینی ژینا و سەربەدارانی زیندانەکانی داگیرکەر، شاد بکەین.



پارتی ئازادیی کوردستان PAK

24رێبەندانی 2723 کوردی 
13 فێوریەی 2024زایینی

سەرەوە