پەیامی سەرۆکی PAK بەبۆنەی رۆژی جیهانیی ژن

08/03/2024

پەیامی سەرۆکی PAK بەبۆنەی رۆژی جیهانیی ژن 
  ( بۆ پێشەوە بەرەو  سەربەخۆیی کوردستان و کۆمەڵگایەکی یەکسان).

بەبۆنەی گەڕانەوەی 8ی مارس رۆژی جیهانیی ژن، پیرۆزبایی لە ژنانی  کوردستان لە هەموو بەشەکانی خاکی نیشتمان دەکەم. 
ئازارەکانی ژنانی کوردستان ھەرگیز بە ڕۆژێک بەیان ناکرێن و ھیچ ڕۆژێک بەتەنیا ناتوانێ بیرھێنەرەوە و ناسێنەری مێژووی دوانەیی ستەم و ڕاسان، ڕەنج و پەڕاوێزخران، ڕۆڵ و دامان، سرووشک و سەما، شادی و شیوەنی ژیانی ژنانی کوردستان بن.
   چیرۆکی بەسەرھات و ژیانی ژنی کورد لە ژێر ستەمی داگیرکەرانی کوردستاندا شایانی تەرخانکردنی ڕۆژان و بۆنەیەلی زۆرە. بەڵام داخی گرانتر ئەو کاتەیە کە بکەر یان ھۆکاری ستەم و ئازارەکانیان، خۆماڵیی بن. 
ئێمە لە پارتی ئازادیی کوردستان ھاوتەریب لە گەڵ خەبات بۆ ڕادانی داگیرکەر و گەیشتن بە دەوڵەت و سەربەخۆیی کوردستان، بەربەرەکانێ لە گەڵ هەر داب و نەریتێکی کۆمەڵایەتی و هەر هۆکارێکی یاسایی و کەلتووریی و ئابووریی کە بناخەکانی هەڵاواردنی رەگەزیی و خوڵقاندنی توندوتیژیی لە دژی ژن پێکدەهێنن و گەیشتن بە کۆمەڵگایەکی مرۆڤسالار کە تێیدا پەسندکراوە نێودەوڵەتییەکانی تایبەت بە ماف و ئازادییەکانی ژن بچەسپێنێ؛ لە گەوھەری تێکۆشانمانە. 
لە ریزەکانی پارتی ئازادیی کوردستاندا وێڕای بەربەرەکانێ لەگەڵ هەر ڕوانگەیەکی دژی ژن و ھەر ڕەفتارێک کە کەسایەتی و پێگە و مافەکانی ژن پێشێل بکا، بەردەوام دەبین لە پەروەردە و خوڵقاندنی دەرفەتی پێویست بۆ پەرەپێدان بە دەوری ژن لە هەموو ئاستەکاندا. 
ھاوکات لە گەڵ ئۆگریی و لێبڕاویمان بۆ وەدیھێنانی   ئەو بەھا بەرزانە، ئەو ڕاستییەشمان لەبەرچاوە کە سەربەخۆیی کوردستان و گەیشتن بە کۆمەڵگایەکی یەکسان و مرۆڤسالار ئەرک و مافی ھاوبەشی ژن و پیاوە و ھیچیان بە لێکترازان و لێکڕاسان و دژبەریی و شەڕی نێوانیان وەدیی نایەن.  
لەم بۆنەیەدا سڵاو دەنێرین بۆ  دایکانی زیندوو و مردووی ڕچەشکێنی ڕێی تێکۆشان،بۆ ژنانی ڕاپەڕینەکانی سەر شەقامەکان و تەوارەکانی ڕیزەکانی پێشمەرگە، بۆ ژنانی دیلی بەندیخانەکانی دەوڵەتانی داگیرکەری کوردستان و بۆ  ژنە شەھیدەکانی مەیدانەکانی ئێعدام و گۆڕەپانەکانی نەبەرد لە گەڵ داگیرکەران.
 بە یەکڕیزی و یەکێتی ژنان و پیاوانی نیشتمان بۆ پێشەوە بەرەو  سەربەخۆیی کوردستان و کۆمەڵگایەکی یەکسان.

حسەین یەزدانپەنا
٨ی مارسی٢٠٢٤