خاوەنی یەكێك لە كۆنترین مێژووەكانی نەتەوەكانی جیهانم بەڵام “وڵاتێكی سەربەخۆم” نییە

11/03/2024

 هەڵگورد حەسەنی

ئەگەر لە كوردانی دانیشتووی مەهاباد، هەولێر، ئامەد، عەفرین، یان هەر كوردێكی دانیشتووی هەر شوێنێكی دیكە لەم جیهانە پرسیار بكەیت كە سەر بە چ نەتەوەیەكن ؟ بێ جیاوازی شوێن و كات دەڵێت من كوردم.
گوومانی تێدا نییە كە زۆربەی خەڵكی كوردستان لە شێوەزاری یەكدی تێ نەگەن یان تەنانەت، لەبەر پرۆسەی ئاسمیلاسیۆن لە بەشە داگیركراوەكانی كوردستان وایان كردبێت كە تەنانەت زمانی كوردی تێ نەگەن و بەڵام خۆشیان بە كورد بزانن.
نەتەوەیی كورد خاوەن زمانێكی هاوبەشی سەرانسەری نییە، ئەوەی ئاماژەی پێ دەكرێت بەناوی زمانی كوردی تەنیا كۆكراوەی چەندین شێوەزاری زمانی كوردییە، نەك زمانێكی هاوبەشی سەرتاسەری.
جگە لەوانەش زمانی كوردی كەوتووەتە بەر كاریگەری سیستەمی داگیركەرەوە.
مامۆستا هەژار دەڵێ: نەتەوەی كورد كە هەزار ساڵە كەس ئاوڕی لێ نەداوەتەوە، بەڵكوو لە ژێر كاریگەری زمانی: عەرەبی، فارسی، توركی دان و زمانی دیكەیان بە زۆری زۆرداری جیهان پێ خوێنراوە، قەت كوردی نانی لێ پەیدا نەبووە، بەڵام بەو حاڵەش كورد لە ئەدەبی خۆی لای نەداوە.
چ شتێك یان تایبەتمەندییەك كوردبوون لە عەرەببوون، فارسبوون یان توركبوون جیا دەكاتەوە؟
وەڵامەكەی ئەوەیە كە خاڵێكی هاوبەش كە هەموومان پێكەوە هەمانە ئەویش، سروودی نەتەوەیییە، جەژنی هاوبەشی نەتەوەیییە، مێژووی هاوبەشی نەتەوەیییە، هەستی داگیركراوی و زوڵمی هاوبەشە، بیرەوەری قوربانی و بەرەنگاری و تێكشكاندن و سەركەوتنی هاوبەشە، خەون و ئاواتی هاوبەشە كە لە پێناو سەربەخۆیدا دێنە دی.
ئەم هەستە پیرۆزە پێی دەڵێن( كوردایەتی).