گۆرانکارییەکانی ڕۆژهەڵاتی نێوەڕاست و دۆزی کورد

26/04/2025 نوسەر

جوانشێر رەفعەتی

هەر وەک هەموولایەک لەم ڕۆژانەدا دەیبینن و گوێ بیستی دەبن ، ناوچەکە لە قۆناغێکی هەستیارد دایە و لە هەر ئان و ساتێکدا لە ئەگەری رێکنەکەوتنی ئەمریکا و ئێران دا شەڕێکی گشتگیری وێرانکەری لێ بکەوێتەوە ، هەر بۆیە هەموو چاوەیان لە سەر ئاکامی دانیشتنەکانی مەسقەت بڕیوە.
بە بۆچوونی من ؛ لە ئێستادا هیچ لایەنێک چ بە ئیسرائیل و ئەمریکا و ئێرانەوە توانای ئیدارە و تێچووی شەڕێکی درێژخایەنیان نییە ، و تێچووی ئەم شەڕەش بێجگە لەسەر لایەنەکانی بەشداربووی ئەم شەڕە ، بە گشتی قەیرانەکانی لەسەر جیهان و بە تایبەتی لە سەر وڵاتانی ناوچەکەشی لێ دەکەوێتەوە.
هەر بۆیە لایەنەکانی ئەم گرژییانە و هاوپەیمانەکانیان هەموو هەوڵیان ئەوەیە ؛ بە بێ سەرهەڵدانی شەڕێکی نوێ ، هەژموونی خۆیان لە سەر داهاتووی ناوچەکەدا بەسەر ئەوی دیکەدا زاڵ بکەن ، و بەرژەوەندی خۆیان و هاوپەیمانەکانیان بۆ چەند دەیەی داهاتوو مسۆگەر بکەن ، و ئەگەر بەشێەوەیەکی کاتیش بووە لانیکەم بۆ ماوەیەک کۆتایی بە هەموو گرژییەکان بێنن .
لەم نێوەندەدا ئەوەی بۆ ئێمەی کورد گرنگە ؛ ئەوەیە کە لە ئەگەری ئەم ڕێکەوتنە لە ناوچەکەدا کورد چۆن ڕۆڵی خۆی دەگێڕێت ، و بەرژەوەندییەکانی نەتەوەیی چۆن دابین دەکات!!؟؟
بەبڕوای من ؛ یەکەم و گرنگترین هەنگاو ئەوەیە کە هەموو کورد دەسکەوتی ڕۆژئاوای کوردستان لە بەرانبەر دوژمنایەتی تورکیا و حکومەتی جۆلانی بپارێزێت . هەر بەم مەبەستە حکومەتی هەرێمی کوردستان دەبێت ؛ هەموو هەوڵی خۆی بخاتەگڕ کە لە ڕێگای دیپلۆماسی و لۆبییەوە ، پشتیوانی وڵاتانی ناوچەکە بەتایبەت کەنداو و ئەوروپا و ئەمریکا بۆ رۆژئاوای کوردستان بەدەست بێنێت ، لەبەر ئەوەی هەرچەندە پێگە و دەسەڵات و ڕۆڵی کورد لە داهاتووی سووریادا بەهێزتربێت ، ڕەنگدانەوە لە سەر بەشەکانی دیکەیی کوردستان و بەتایبەتیش باشوور دەبێت ، و بەپێچەوانەشدا لە ئەگەری لاوازبوونی رۆژئاوای کوردستان هەموو کورد لێی زەرەرمەند دەبێت.