ئێران هێرش دەکاتە سەر کانادا و وڵاتانی رۆژاوایی

18/11/2021

دەوڵەتی تاران، لە وەڵامێکدا بەرانبەر بە بڕیارنامەی کۆڕی گشتیی رێکخراوی نەتەوەیەکگرتووەکان سەبارەت بە پێشێلکردنی دیار و سیستەماتیکی مافی مرۆڤ لەژێر دەسەڵاتی ئێراندا، هێرشی توندی کردە سەر کانادا و وڵاتانی دیکەی رۆژاوایی و بە پێشلێکەری مافی مرۆڤ و هاودەستییان لەگەڵ ئیسرائیل لە سەرکوتی فەلەستینییەکان تۆمەتباری کردوون.
سەعید خەتیبزادە، وتەبێژی وەزارەتی دەرەوەی ئێران، روو لە کاربەدەستانی کانادایی کە رەشنووسی ئەو بڕیارنامەیەیان داڕشتووە، گوتی: "وەڵامدەری هاودەستیتان لەگەڵ دەوڵەتی دژە مرۆڤی ئیسرائیل لە خوڵقاندنی جینایەت دژی خەڵکی فەلەستینیش ببن".
ناوبراو هاوشێوەی کاربەدەستانی دیکەی تاران، رایگەیاند کە ئەم بڕیارنامەیە دەرەنجامی گوشارە سیاسییەکان و هەڕەشە جۆراوجۆرەکانە و ئەوەی بە ناوزڕاندنی ئێران دایە قەڵەم و گوتوویەتی کە کانادا خووی بەم پڕۆژەیەوە گرتووە. 
ئەوەی جێگەی سەرنجە لە وەڵامەکەی خەتیبزادەدا ئەوەیە کە بەبێ ئەوەی وەڵامی هیچ یەک لەو بابەتە روونانەی پێشێلکردنی مافی مرۆڤ لە ئێران بداتەوە، راستەوخۆ هەڵوێستی دەوڵەتی کانادا و وڵاتانی دیکەی پشتیوانی ئەم بڕیارنامەیە مەحکوم دەکات و ئەوە بە دوور لە هەرچەشنە راستیی و لایەنی یاسایی ناودەبات.
شایانی باسە کە لە رۆژی 26 گەڵاڕیزانی ئەمساڵ، کۆمیتەی سێهەمی کۆڕی گشتیی رێکخراوی نەتەوەیەکگرتووەکان، بە پەسندکردنی بڕیارنامەیەک ێشێلکردنی دیار و سیستەماتیکی مافی مرۆڤ لەژێر دەسەڵاتی ئێراندا، مەحکومکرد.