بەیاننامەی PAK سەبارەت بە گرتنی رۆڵەکانی کوردستان لە سەر ڕێوڕەسمەکانی نەورۆز

24/03/2022

بەیاننامەی PAK سەبارەت بە گرتنی رۆڵەکانی کوردستان لە سەر ڕێوڕەسمەکانی نەورۆز


دامەزراوە ھەواڵگریی و ئاسایشییەکانی دەوڵەتی داگیرکەری فارس لە کوردستان، لە رۆژی یەکەمی نەورۆزەوە لە زۆربەی شار و دەڤەرەکانی رۆژهەڵاتی داگیرکراو،لێشاوێکی گرتن و زیندانیی کردنی رۆڵەکانی  نەتەوەکەمانیان وەڕێکخستووە.
رۆڵەکانی رۆژهەڵاتی نیشتمان سەرەڕای ھەموو ئەو لەمپەڕانەی دەوڵەتی داگیرکەر لە سەر رێی بەڕێوەچوونی جەژنی نەورۆزی دانابوو،  نەورۆزیان پڕشکۆ بەڕێوەبرد و ئەم رێوەڕەسمەیان کردە دەرفەتێک بۆ بەرەنگاربوونەوەی ناسنامەیی، کەلتووری و سیاسیی، بەرانبەر دەوڵەتی داگیرکەری فارس و پتر لە ھێما و ناوەرۆکی ساختە و داسەپاوی ئێرانییان داماڵی. دوژمنی داگیرکەر کە پێی وا بوو بە ھەڕەشە و گوڕەشەو ئەو ڕێوشوێنانەی وەک مەرجی رێپێدانی بەڕێوە چوونی جەژنی نەورۆز داینابوون؛ نەورۆزێکی سارد و سڕ و بێ پەیام و ناوەرۆک بەسەر کورد و کوردستاندا دەسەپێنێت، ئێستا داخی خۆی لەو شکستە، بە گرتن و زیندانیی کردنی رۆڵەکانی کوردستان دەڕێژێت.
پارتی ئازادیی کوردستانPAK وێڕای لە قاودانی گرتن و زیندانیی کردنی ئەو پۆلە لە بەڕێوەبەران و بەشدارانی ڕێوڕەسمەکانی نەورۆز، داوا لە رێکخراوە نێودەوڵەتییەکان و کۆڕوکۆمەڵە جیھانییەکانی تایبەت بە مافەکانی مرۆڤ دەکات بۆ بەهاناوە ھاتنی ئەو گیراوانە و رێگرتن لە درێژەی گرتن و بەند کردنی زیاتری خەڵک، تاران بخەنە ژێر گوشارەوە.
 پارتی ئازادیی کوردستان ھیوادار و دڵنیایە کە هەر وەک چۆن یەکڕیزیی نەورۆزیی خەڵک و ئاگری بە بڵێسەیان پیلانی تارانی دژی نەورۆزی کوردایەتیی تێکشکاند،تێکۆشان و بەرخۆدان و قوربانییدانی ئەم نەتەوەیە سەرەنجام بەر دێنێت و سەروەریی دەوڵەتی فارس بەسەر کوردستانەوە ھەڵدەگرێت.


پارتی ئازادیی کوردستانPAK

4ی خاکەلێوەی2722ک
24ی مارسی 2022ز