ڕۆژهەڵاتی داگیرکراو دیسان ناسنامە و پرس و کۆڵنەدانی خۆی نواندەوە! راگەیەندراوی پارتی ئازادیی کوردستان PAK بەبۆنەی شکستی تاران لە کوردستان

01/03/2024

ڕۆژهەڵاتی داگیرکراو دیسان ناسنامە و پرس و کۆڵنەدانی خۆی نواندەوە!
راگەیەندراوی پارتی ئازادیی کوردستان PAK بەبۆنەی شکستی تاران لە کوردستان

   ئەمڕۆ جارێکی دیکە ڕۆژهەڵاتی داگیرکراو ناسنامە و پرسی خۆی نواندەوە. ئەمڕۆ جارێکی دیکە لە دەرفەرت و بەستێنێکی دیکەدا ناتەبایی ئانتاگۆنیستیی نێوان کوردستان و دەوڵەتی فارس، دەرکەوتەوە. ئەمڕۆ کوردستان سەرەڕای داگیرکراویی و بە کۆڵەوەبوونی زامە قووڵەکانی، پیشانیدا کە ئیرادەی ئەستاندنی ئازادیی و سەروەریی لە شکاننەهاتووە.
    ئەمڕۆ کوردستانیان بە بایکۆت و بەشداریی نەکردن لە شانۆگەرییەکانی تاران دا، دەوڵەت و گەلەخانی مەجلیس و دامەزراوی ڕیا و تەزویری هەڵبژاردنیان ڕیسوا و پەکخست.
  ئەمڕۆ هیچ درۆ و فرت و فێڵێکی ئاخوندانەی دوژمنی داگیرکەر نەیتوانی دانیشتوانی کوردستان ڕکێشی سەر سنووقەکانی هەڵبژاردن بکات و بازاڕی ئەو شانۆگەرییە بە سەر دەستی بەڕێوەبەرانییدا  مایەپووچ و بێ بەرهەم  مایەوە!
  ئەمڕۆ هەر کوردستانییەک بە بایکۆتی شانۆگەرییەکانی تاران و خۆبواردن لە تێکەڵبوون بە یارییەکانی باڵباڵێنی نێوخۆیی تاقم و دارودەستەکانی دەوڵەتی داگیرکەر، هەنگاوێک لە ڕۆژی ڕزگاریی کوردستان نزیک بوویەوە.
   بەشداریی نەکردنی ڕۆڵەکانی کوردستان لە گاڵتەجاڕییەکانی ئەمڕۆی  تاران درێژەی بەرەنگاریی نەتەوەیی پاش جیهادی خومەینی و راپەڕینی ژینا بوو بە ڕەهەند و شێوازێکی دیکە. ئەوەی گەوهەری ئەم ڕەفتارەی پێکهێناوە هەمان باوەڕە کە: داگیرکەری ئێرانی قاتڵی ژیناکان و زەوتکەری سەروەریی نەتەوەیی و تاڵانکەری سامانی نیشتمانیی و تێکدەری ژینگەی کوردستانە.
   پارتی ئازادیی کوردستان شانازیی لە سەرکەوتنی ئەمڕۆی کوردستانیان بە سەر تاراندا دەردەبڕێ و سەری ڕێز لە حاست نەتەوە کۆڵنەدەرەکەمان دادەنەوێنێ.

شەکاوە بێ ئاڵای تێکۆشان لەپێناو دەوڵەت و سەربەخۆیی کوردستان

پارتی ئازادیی کوردستانPAK

١١ی ڕەشەمەی ٢٧٢٣ک
١ی مارسی ٢٠٢٤ ز