​ راگەیەندراوی پارتی ئازادیی کوردستان لەمەڕ لەسێدارەدانی سێ بەندکراوی کورد، بەتۆمەتی هاوکاریی مۆساد. «تاران تۆڵەی شکستیی شەڕ؛ لە کوردستانییان دەکاتەوە»

26/06/2025

راگەیەندراوی پارتی ئازادیی کوردستان لەمەڕ لەسێدارەدانی سێ بەندکراوی کورد، بەتۆمەتی هاوکاریی مۆساد.
«تاران تۆڵەی شکستیی شەڕ؛ لە کوردستانییان دەکاتەوە»

دوای شکست و داماویی لە شەڕی ١٢ رۆژەی دژی ئیسراییل و کوژرانی ژمارەیەکی زۆر لە فەرماندە و زانا ئەتۆمییەکانی؛ دەوڵەتی داگیرکەر ٣ بەندکراوی کوردی بەناوەکانی«ئیدریس ئالی» و «ئازاد شوجاعی» خەڵکی گوندی «دۆڵەگەرمە» سەردەشت و «ڕەسوڵ ئەحمەد محەممەد»خەڵکی شاری سلێمانی، بەتۆمەتی بێبنەمای سیخوڕیی و هاوکاریی مووساد لە کوشتنی «مۆحسین فەخریزادە»، لە زیندانی ورمێ لە سێدارەدا.
بەمجۆرە دەوڵەتی داگیرکەری ئێران، داخی شکست و دۆڕانی لەو شەڕدا بە بەندکراوانێکی بێ تاوان ڕشت کە نە پێوەندییان بەو شەڕەوە ھەبوو و نە لەو ١٢ ڕۆژەدا، لە ژیانی ئازاد و ئاسایی دا بوون. 
ئەم تاوانە بیرخەرەوەی کوشتاری بە کۆمەڵی زیندانیانی سیاسییە کە خومەینی پاش ھەڵقوڕانی جامە ژەهرەکەی و ملدان بە ئارگربەس لە شەڕی لە گەڵ عێراق، کەوتە گیانی بەندکراوانی سیاسیی و ئەو تاوانە گەورە فاشیستییەی خوڵقاند.
کۆماری ئیسلامیی ھەڕەشە و مەترسیی لە سەر رۆژھەلاتی ناوەڕاست و جیھانی لە کوشتاری دانیشتوانی ناو جوغرافیای ئێرانەوە دەست پێکرد و دواجار بووە ھەڕەشە و مەترسیی لە سەر ئاشتی و سەقامگیریی لە ڕۆژھەڵاتی ناوەڕاست و بگرە گشت جیھان. ئێستاش پاش ئەو شکستە، جارێکی دیکە بای داوەتەوە سەر ڕێچکەی سەرەتای. ئەوەش بازنەیەکی خوێناوییە کە تاران تێیدا دەسووڕێتەوە.
  بۆیە ئاسایشیی مرۆڤیی دانیشتوان، کوردستانیان و وڵاتانی ناوچەکە و جیھان حوکم دەکا، ھەمووان لە بەرەیەک بەرەنگاری مەکینەی کوشتار و جەنگ و کاولکاریی تاران ببینەوە. پێویستە ئەنجومەنی ئاسایشی نێودەوڵەتیی، یەکێتی ئەوروپا و رێکخراوە جیھانییەکانی مافی مرۆڤ لە ئێعدامی ئەو بەندکراوانە بێنە دەنگ و بە فشار و مەرجدانان لەسەر تاران، ڕێ لە کوشتاریی پتر، بگرن و ڕێگا نەدەن بەندکراوانی سیاسیی نەتەوەیەکی بێدەوڵەت، بکەونە بەر تۆڵەسەندنەوەی کوێرانەی تاران.
نەمریی بۆ شەھیدانی تازەی دەستی داگیرکەریی.

پارتی ئازادیی کوردستان PAK
٥ی پووشپەڕی ٢٧٢٥ ک
٢٦ی ژووەنی ٢٠٢٥ز