بارزانی به‌ هه‌ڵگرتنی گوتاری ده‌وڵه‌ت و سه‌ربه‌خۆیی و رێبه‌رایه‌تی كردنی رێفراندۆم، گیانێكی نوێی به‌به‌ر ناسیۆنالیزمی كورددا كرده‌وه‌:

29/08/2021

🔶بارزانی به‌ هه‌ڵگرتنی گوتاری ده‌وڵه‌ت و سه‌ربه‌خۆیی و رێبه‌رایه‌تی كردنی رێفراندۆم، گیانێكی نوێی به‌به‌ر ناسیۆنالیزمی كورددا كرده‌وه‌:
 
له‌ په‌یامێكی پیرۆزبایی دا بۆ رێبه‌ری نه‌ته‌وه‌یی كورد سه‌رۆك بارزانی، به‌ بۆنه‌ی 75ساڵه‌ی له‌ دایكبوونی خۆی و پارتی دێموكراتی كوردستان، وێڕای ده‌ربڕینی ئه‌و راستییه‌، هیوام خواستووه‌، به‌گه‌یاندنی كوردستان به‌ ئازادیی و سه‌ربه‌خۆیی یه‌كجاریی، ئه‌ركی ته‌واو نه‌كراوی ژێنێڕاڵ بارزانی و كاك ئیدریسی برای و شه‌هیدانی ئه‌و رێبازه‌، وه‌دیی بێنێت. 
ده‌قی په‌یامه‌كه‌م به‌مجۆره‌یه‌:

به‌ڕێز جه‌نابی سه‌رۆك بارزانی         
رێبه‌ری نه‌ته‌وه‌یی كورد
 
سڵاوی خه‌بات و تێكۆشان
  به‌ بۆنه‌ی ٧٥هه‌مین ساڵوه‌گه‌ڕی دامه‌زراندنی پارتی دێموكراتی كوردستان و هاوكات ٧٥ ساڵه‌ی له‌ دایكبوونی به‌ڕێزتان، پیرۆزباییه‌كی گه‌رمتان پێشكه‌ش ده‌كه‌م. 
له‌م بۆنه‌یه‌دا هه‌زاران سڵاو پێشكه‌شی رۆحی پاكی ژێنێڕاڵ مسته‌فا بارزانی نه‌مر ده‌كه‌م كه‌ نیو‌سه‌ده‌ی ژیانی له‌ پێناو ئاوات و ئامانجه‌ پیرۆزه‌كانی نه‌ته‌وه‌ی كورد، له‌ جه‌نگ وململانێ و تێكۆشاندا برده‌سه‌ر و رێگای خه‌بات له‌ پێناو رزگاری و سه‌ربه‌خۆیی رووناك كرده‌وه‌.
 هه‌روه‌ها سڵاو ده‌نێرم بۆ گیانی نه‌سره‌وتووی كاك ئیدریس بارزانی كه‌ باشترین ساڵه‌كانی ته‌مه‌نی لاوێتی شانبه‌شانی جه‌نابتان و به‌دوای بارزانی سه‌ركرده‌وه‌ بۆ‌ تێكۆشان و به‌رخۆدانی كوردایه‌تی ته‌رخان كرد.
سڵاوی ئه‌مه‌گ و وه‌فا پێشكه‌شی به‌ڕێزتان ده‌كه‌م، كه‌ هه‌موو لاوێتی و توانا و ته‌مه‌نی خۆتان پێشكه‌شی رزگاریی كوردستان و وه‌دیهێنانی خه‌ونی سه‌ركرده‌ مێژووییه‌كانمان و پاراستنی ده‌سكه‌وته‌كانی خه‌بات كردوه‌و به هه‌ڵگرتنی گوتاری ده‌وڵه‌ت و سه‌ربه‌خۆیی و سه‌ركردایه‌تی كردنی رێفراندۆمی مێژوویی ٢٠١٧ی باشووری كوردستان، گیانێكی نوێتان به‌به‌ر ناسیۆنالیزمی ئازادیبه‌خشی كورد دا كرده‌وه‌. 
  هیوادار و ئاواته‌خوازم، به‌ڕێزتان هه‌ر ساخ و سڵامه‌ت بمێنن و، ئه‌ركی ته‌واو نه‌بووی ژێنێڕاڵ بارزانی و كاك ئیدریس و رێبوارانی شه‌هیدی رێگاو رێبازیان به‌ گه‌یاندنی  نه‌ته‌وه‌ و نیشتمانی زامدارمان به‌ ئازادیی و سه‌ربه‌خۆیی یه‌كجاریی ته‌واو بكه‌ن و، ئاواتی له‌مێژینه‌ی ئه‌م نه‌ته‌وه‌یه‌ وه‌دیبێنن. 

به‌ڕێزه‌وه‌
پێشمه‌رگه‌ی رێگای ئازادیی و سه‌ربه‌خۆیی كوردستان
حسه‌ین یه‌زدانپه‌نا

٢٥ی گه‌لاوێژی٢٧٢١ك
١٦ی ئووتی ٢٠٢١ز