ئیدارەی ئیتلاعات هەواڵی کوژرانی رۆڵەیەکی کورد رادەگەیەنێ

15/09/2021

ئیدارەی ئیتلاعات هەواڵی کوژرانی رۆڵەیەکی کورد رادەگەیەنێ



‎رۆڵەیەکی کورد لە لایان هێزەکانی ئیتلاعاتی ئێرانەوە دەسگیردەکرێ و دەگوێزرێتەوە بۆ یەکێ لە زیندانەکانی ئیتلاعاتی ورمێ؛ و لەم ماوەیەدا سەرەڕای بەدواداچوون و گەڕانی بنەماڵەکەی بەدوایدا هیچ هەواڵێکی لێ نازانرێ و هیچ پێوەندییەکی بە بنەماڵەکەیەوە نابێ.

‎یاسر مەنگوڕی، خەڵکی پیرانشار لە رێکەوتی  ١٧/٧/٢٠٢١ لە لەلایان هێزەکانی ئیتلاعاتەوە قۆڵبەست و رەوانەی زیندان دەکرێ. پاش چەند مانگ لە بێسەروشوێنیی، 
‎بەرپرسی پەیوەندییە گشتییەکانی دادگوستەریی پارێزگای ورمێ رایگەیاندووە کە یاسر مەنگوڕی نەک لەژێر ئەشکەنجە، بەڵکوو لە ئاکامی شەڕ و رووبەڕووبوونەوەی چەکداریی کوژراوە و ناوبراوی بە ئەندامی گروپە دژبەرەکانی شۆڕش ناوبردووە.

‎بە گوێرەی وتەی یەکێ لە ئەندامانی بنەماڵەکەی ئیدارەی ئیتلاعات پێی‌راگەیاندوون کە یاسر لە کاتی حەولدان بۆ دەستگیرکردنی لە ئاکامی تەقەی هێزە ئەمنییەکان کوژراوە

‎یاسر مەنگوڕی ٤٠ ساڵان، کوڕی مستەفا، خێزاندار و باوکی دوو منداڵە؛ لە ١٣/٩/٢٠٢١ هەواڵی کوژرانی بە فەرمیی لە رێی تەلەفۆنەوە بە بنەماڵەکەی رادەگەیێنرێت.

ھەتا نەتەوەکەمان بە بندەستی و بێدەوڵەت بژی و لە ژێر حوکمی تاران دا بێ، کوشتاری رۆڵەکانی کوردستان نابڕێتەوە.