هەرێمی کوردستان؛ بەردەوامیی پشتیوانیی نێودەوڵەتیی، چارەسەری درمە نێوخۆییەکان

18/09/2021

هەرێمی کوردستان؛ بەردەوامیی پشتیوانیی نێودەوڵەتیی، چارەسەری درمە نێوخۆییەکان

حسەین یەزدانپەنا

کشانەوەی کتووپڕ و پڕکارەستاتی ئەمریکا لە ئەفغانستان، رووخانی حکوومەتی ئەفغانستان و گەڕانەوەی تالیبان بۆ حوکم، لە کوردستان کەشووهەوایەکی لێکەوتەوە کە لە لایەک هێندێک نیگەرانیی دروست بکا و لە لایەکی دیکەوە ددان لە هەرێمی کوردستان تیژ دەکرا.
خاڵی هاوبەشی نیگەرانیی و هەڕەشەکان، ئەگەری کشانەوەی ئەمریکا لە عێراق و هەرێمی کوردستان بوو.
ترافیکی دیپلۆماسیی هەولێر کە سەردانەکەی سەرۆک ئیمانۆئیل ماکڕۆن لووتکەی بوو، دەورێکی گرینگی لە رەواندنەوەی نیگەرانییەکان گێڕاو و زەبرێکی قورسی لە سەرچاوەکانی هەڕەشەکان وەشاند.ئێران داخی خۆی لەو ترافیک و زەبرە، بە هەڕەشەو تۆپ و درۆن تێگرتن لە حیزبەکانی رۆژهەڵات، بە هەرێمی کوردستان رشت.
 پێشوازیی گەرمی ئەمڕۆی بۆریس جۆنسۆن سەرۆکوەزیرانی بەریتانیا لە رێزدار نێچیروان بارزانی سەرۆکی هەرێمی کوردستان،بێجگە لە رەهەندەکانی دیکەی، مانا گەورەکەی بریتییە لە بەردەوامیی پشتیوانیی نێودەوڵەتیی لە هەرێمی کوردستان. ئەوە دڵنیاییەکی باش بە کورد بە گشتی و هەرێمی کوردستان بە تایبەتی دەدا. ئەمە هەواڵێکی باشە بۆ هەموو نەتەوی کورد لە رۆژهەڵاتی ناوەڕاست. چوونکە ئەوەی نەتەوەیەکی50 ملوێنی ئێستا حازر و نەخد وەک ئاکتۆرێکی نێودەوڵەتی دانپێدانراو هەیەتی ئەم قەوارەیەیە. هەروەها ئەوەی جارێکی دیکە دەتوانێ دەرفەتێکی دیکە بۆ هەنگاوە مەزنەکە ساز بکاتەوە، هەرێمێکی بەهێز و خاوەن پشتیوانیی نێودەوڵەتییە. لە خاڵی بەرانبەردا هەواڵەکە بۆ سەرچاوەکانی هەڕەشە لە هەرێمی کوردستان یەکجار ناخۆشە.
واچاکە و وا پێویستە، رۆڵەکانی کوردستان، تێگڕا، هاوکات لە گەڵ هەر رەخنەیەک، پشتیوانیی لە هەرێمی کوردستان و دەسکەوتە نەتەوەیی- نیشتمانیی و بانحیزبییەکانی بکەن.
 ئێستا کە بەڕێز سەرۆکی هەرێمی کوردستان، بە دەستی پڕەوە، دەگەڕێتەوە هەرێمی کوردستان، پێموایە پێویستە بۆ چارەسەرکردنی دوو درمی کوشندە، هەنگاو بنێ:
یەکەم: داناني نەخشەرێگایەک بۆ کۆتاییهێنان بەو لێکترازانە سیاسییانەی لە ٢٠١٧ەوە رووی لە هەرێمی کوردستان کردووە و روو لە هەڵکشانە. چارەسەرکردنی ئەمەیان، کوردستان لە بەستێنی ناوخۆییدا بەهێزتر دەکاتەوە.
دووهەم: حەولدان بۆ سازکردنی کەشووهەوایەکی لەبار بۆ خولێکی دیکەی گفتووگوی تورکیا لە گەڵ ئیمرالیی. کرانەوەی ئەم دەرگایە، خوێنبەندێک دەبێ بۆ نەڕژانی خوێنی پێشمەرگەی کورد و گەریلایP.K.K.

٢٦ی خەرمانانی٢٧٢١ک
١٧ی سێپتامبری٢٠٢١ک