راگەیەندراوی پارتی ئازادیی کوردستان لەمەر گیان بەختکردنی دوو بەندکراوی سیاسیی کورد لە ژێر ئەشکەنجەی داگیرکەراندا

21/09/2021

راگەیەندراوی پارتی ئازادیی کوردستان
لەمەر گیان بەختکردنی دوو بەندکراوی سیاسیی کورد لە ژێر ئەشکەنجەی داگیرکەراندا

رۆڵەکانی نەتەوەی مەزنی کورد!
کوردستانییانی نیشتمانپەروەر!

 ئەسعەد رامین و داوود رەحیمی خەڵکی نەغەدە، پاش بیست رۆژ لە دەسبەسەرکرانیان لە لایان ئیتلاعاتی سپای پاسدارانەوە لە ورمێ ، لە ژێر ئەشکەنجەی داگیرکەراندا گیانیان سپاردوە.
گرتن و ئەشکەنجەدان و کوشتاری بەندکراوانی سیاسیی کورد لە لایان دەوڵەتی داگیرکەری ئێرانەوە، درێژەی سیاسەتی داگیرکەرانەی ئەو دەوڵەتەیە بۆ تواندنەوە و داگیرکردن و چاوترسێن کردنی کورد و هێشتنەوەی بە بندەستیی.
دەوڵەتی داگیرکەری ئێران بە پێشێلکردنی گشت مافەکانی مرۆڤ، بێ پرینگانەوە کەڵک لە هەموو رێگاو ئامرازێک وەردەگرێ بۆ سەرکوت و لەنێو بردنی رۆڵەکانی نەتەوەکەمان.
پارتی ئازادیی کوردستان، وێڕای پرسە و سەرەخۆشیی لە کەسوکارو بنەماڵەی ئەو رۆڵە شەھیدانە، گرتن و کوژرانی رۆڵەکانی نەتەوەکەمان لە لایان دەوڵەتی تارانەوە مەحکوم دەکا و سوورە لەسەر ئەوەی کە گرتن، لێدان، ئەشکەنجە، بێ‌سەروشوێن کردن وکوشتار و ئیعدامی رۆڵەکانی نەتەوەی کورد تەنیا بە راماڵینی داگیرکەران لە نیشتمان و رزگاریی نەتەوەیی کۆتایی دێ و ئاسوودەیی و کۆتاییهاتنی هەموو ئەو تاوان و نەهامەتیانە، لە گرەوی سەربەخۆیی کوردستاندایە.

پارتی ئازادیی کوردستان
کۆمیتەی راگەیاندن

٢٩ی خەرمانانی ٢٧٢١ک
٢٠ی سێپتامبری٢٠٢١ز