چوارەمین ساڵوەگەڕی ماڵئاوایی هونەرمەندی کۆماری کوردستان

29/10/2021

هه‌ر عاشقه‌ سووچیشی نه‌بێ ده‌یخه‌نه‌ ئه‌ستۆی
شه‌م ئاگری کردۆته‌وه‌، په‌روانه‌ بڵێ چی؟

یادت به‌خێر مه‌لی سه‌رهه‌ڵگرتووی زامداری كۆنه‌ برینان؛ شێخی خانه‌قای شێعری ئه‌وین و به‌ره‌نگاریی.

#هێدی شاعیر ناوی تەواوی (خالید حیسامییە ) ناسراو بە (هێدی) لە ساڵی (١٩٢٧) لە گوندی شێخاڵی سەر بە شاری بۆکان لەدایک بووە ، لە ساڵی (١٩٤٦) بەشداریی لە دامەزراندنی کۆماری کوردستان کردووە ، لەدوای ڕاپەڕین گەڕاوەتەوە شاری هەولێر و لەوێ نیشتەجێ بووە .  لە ڕێکەوتی ٢٧/ ١٠/ ٢٠١٦ لە شاری هەولێر کۆچی دوایی کرد . 
ماڵاوا مام هێدی ...

🍁🍁🍁🍁🍁🌹🍁🍁🍁🍁🍁🍁
تۆ پەژارەی چیتە «هێدی» دڵنیابە چارەنووس
چاوەڕێتە، ڕۆژێ هەردێ کوردەواری سەرکەوێ
ناڕژێ ئەسرینی من هێندە، ئەگەر دڵ داکەوێ
ماڵی دڵ وێران بێ، ماڵوێرانی کردم، ناسرەوێ
هێندە بێزارم، دەڵێم دڵ هەر لە سینە بێنمە دەر
تا بزانێ من نەبێ، ئەو ئاگرە کەس نایەوێ
باشە چاو تێبینە دەیڕێژێتە داوێنم، دەنا
گەنجی فرمێسکم هەموو تێدا دەچوو لێرە و لەوێ
بەژنی تۆ گەر سەروە، سایەی خۆت لەسەر من کەم مەکە
ڕووت ئەگەر ڕۆژە عەزیزم مەیگرە، با دەرکەوێ
دەفتەرم پڕ کردەوە ئێستەش دەلیلی وام ‌نییە
فەرقی پێ ‌دانێم لە بەینی خاڵی تۆ و خاڵی کەوێ
گەر پەرەنگی گوارەکەت ئاوا نەلەرزێ لەو سەرە
دەرفەتی بۆ ماچ و کوڵمە گەزتنێ دەست ناکەوێ
من دەڵێم دڵ کۆرپەیە، با لای‌لایی بۆ بکەم
ئەو بە شیعری من کوڵی هەڵدەستێ، ئیتر ناخەوێ
هەر دەبوو ڕۆژی هەوەڵ من دوو دڵم بێ و یەک زمان
تا لە ماڵێک‌دا ئەڤین و ئاوەزم نەبنە هەوێ
بسکەکانی تۆ گوڵم! لاجانگی تۆیان گرتووە
بەو هەناسە ساردە خۆ من ئەو تەمەم پێ‌ ناڕەوێ
من بە یادی تۆوە گۆشێک و خەیاڵێکم بەسە
سووڕی ئەو چەرخە ئەگەر نەمخاتە گێژی گێژەوێ
دوور لە خەڵکی دەس لە ئەستۆی یەک دەکەین ئەمن و خەیاڵ 
کەس ئیتر بەو ڕازە نازانێ کە من لەو چم دەوێ
گەر بەڵێنم لێی بوێ دووبارە بۆ ژوانێکی‌تر
پێم‌دەڵێ شەوگار درێژە کوێ بڵێی من دێمە وێ
من لە سایەی زولفی تۆوە ڕۆژی ڕووناکم نییە
شیوەنم جا تازە کەڵکی چی هەیە نیوەشەوێ
تۆ پەژارەی چیتە «هێدی» دڵنیابە چارەنووس
چاوەڕێتە، ڕۆژێ هەردێ کوردەواری سەرکەوێ
.
هێدی
مارسی ١٩٧٨