راپۆرتی پێشێلکارییەکانی مافی مرۆڤ لە ئێران

12/02/2022

جاوید رەحمان ریپۆرتەری تایبەتی مافی مرۆڤی نەتەوە یەکگرتووەکان بۆ چاودێریی پێشێلکارییەکانی مافی مرۆڤ لە ئێران لە راپۆرتی ئەم دواییەی خۆی‌دا داوا لە کۆمەڵگەی نێودەوڵەتیی دەکات کە لە هەنبەر پێشێلکارییەکانی مافی مرۆڤ لە ئێراندا هەڵوێستیان هەبێت و ئێران وەڵامدەر بێت لەبەرانبەریان.
ئەم راپۆرتە کە بەم نزیکانە لە ئەنجومەنی مافی مرۆڤی نەتەوە یەکگرتووەکان دەخرێتەبەر باس، ئاماژەی بە کۆمەڵێک پێشێلکاریی مافی مرۆڤی لەو وڵاتە کردووە، وەک دەسبەسەرداگرتنی سەروەت و دارایی هاووڵاتییان، تەقەکردن و کوشتن وبریندارکردنی کۆڵبەران لە کوردستان و سوختبەران لە بەلوچستان، قۆڵبەست کردن و دەستگیرکردنی چالاکانی مەدەنی و سیاسی و سەپاندنی حوکمی قورس بەسەریاندا، بارودۆخی خراپی بەندکراوان و ئەشکەنجەدانیان و مەرگی گوماناوییان و ..هتد
هەروەها لە راپۆرتەکەدا ئاماژە بەوە کراوە کە لە ساڵی رابردوودا لە ئێران‌دا زیاد لە 275 کەس لە سێدارەدراون کە 50 کەسیان کورد بوون.
بە گوێرەی راپۆرتەکە لە سەرەتای ساڵی 2021 تاوەکوو مانگی 10ی ئەو ساڵە، نزیکە 500 کەس لە چالاکوانان، ژینگەپارێزان، کۆڵبەران، رۆژنامەنووسان، هونەرمەند، پارێزەران و مامۆستایانی کورد لە لایان دەوڵەتەوە دەسبەسەرکراون و زیاد لە 140 کەسیان تۆمەتی تێکدانی ئاسایشی نیشتمانییان بەسەردا چەسپێندراوە.
جاوید رەحمان ئاماژەی بەوەش کرد وێڕای داواکارییە بەردەوامەکانی لە دەوڵەتی ئێران بۆ ئەوەی سەفەری ئێران بکات بەڵام رێگای پێ نەدراوە و زانیارییەکانی لە رێگای کەس و کار و نزیکانی قوربانیان و چالاکانی مەدەنیی بەدەست هێناوە.
پێشتر لە راپۆرتەکانی خۆی‌دا ئاماژەی بەوەش کردبوو کە زۆر لە حوکمە سەپێنراوەکان لە لایان دادگاکانی ئەو وڵاتە وەک حوکمی ئێعدام لەسەر ئەساسی دانپێدانانی زۆرە ملێ و لەژێر ئەشکەنجەدا بووە.