ژان لۆدریان: کاتی ئەوە هاتووە ئێران بڕیاری خۆی بدات.

16/02/2022

وەزیری دەرەوەی فەڕەنسا ژان ئیڤ لۆدریان دەڵێ چەند رۆژێک ماوە تا بڕیاری کۆتایی لە چارەنووسی رێککەتننامە ئەتۆمییەکە بدرێت.
دانوستانە ناڕاستەوخۆوەکانی نێوان ئەمریکا و ئێران بۆ زیندووکردنەوەی "بەرجام" رێککەوتننامە ئەتۆمییەکەی ساڵی 2015 لە حەوتووی رابردووەوە لە نێوان فەڕەنسا، رووسیا، بریتانیا، چین و ئاڵمان دەستی پێ کردووەتەوە. هەرچەند رۆژاواییەکان گەشبین بوون بە ئاکامی ئەم دانووستان و هەوڵانە بەڵام هێشتا زۆر بابەتی گرنگی چارەسەرنەکراو ماوەتەوە.
لۆدریان وتی : " ئێرانییەکان پێویستە بڕیارێکی سیاسیی بدەن؛ ئەوان لە رۆژانی داهاتوودا یان قەیرانێکی جیددی دەسپێدەکەن یاخود ئەو رێککەوتنە پەسەند دەکەن کە بەرژەوەندیی هەموو لایێکی تێدایە"
لۆدریان دەڵێ ئێستا پێویستە ئێران بڕیاری سیاسیی خۆی بدات و چارەنووسی رێککەوتننامە ئەتۆمییەکە دیاریی بکات.
لۆدریان بە پەرلەمانی فەڕەنسای راگەیاندووە کە دانوستانەکان گەیشتوونەتە کۆتایی و ئێستا بابەتەکە نەک بە چەند حەوتوو بەڵکوو لە رۆژانی داهاتوودا بڕیاری لێ دەدرێت.