لە مانگی ئاوریلی ٢٠٢٢دا لە رۆژهەڵاتی کوردستان زیاد لە ٣٩ کەس دەسبەسەر کراون

04/05/2022

بە پێ ئاماری تۆمارکراو لە ناوەندی ئامار و بەڵگەنامەکانی رێکخراوی مافی مرۆڤی هەنگاو، لە مانگی رابردوو ۳۹ هاووڵاتی کورد لە لایەن هێزە ئەمنییەکانی رێژیمی داگیرکەری ئێران دەستبەسەر کراون کە بە بەراوەردی مانگی پێشوو، ئەم رێژەیە بەرەو بەرزبوونەوە بووە. بە پێ ئەم ئامارە، ۳۰ هاووڵاتی بە تۆمەتی چالاکی سیاسی و هاوکاری حیزبە کوردییەکان، ٨ هاووڵاتی بە هۆی بەشداربوون لە رێوڕەسمەکانی تایبەت بە نەورۆز و ۱ هاووڵاتی بە تۆمەتی چالاکی مەدەنی دەستبەسەرکراون. هەروەها لەم راپۆرتە پارێزگای سنە زۆرترین کەسی لێ دەستبەسەر کراوە و ئەو ناوەندەی کە هاووڵاتییانی دەستبەسەر کردووە، لە لایەن ئیدارەی ئیتڵاعات ۳۱ کەس و لە لایەن ئیتڵاعاتی سوپا ٨ کەس بووە. جێگای سرنج ئەوەیە ئەم هەڵسووکەوتەی رێژیمی داگیرکەری ئێران دەبەسترێتەوە بە بارودۆخی ئاڵۆزی ناوخۆی ئێران کە لە رووی ئابووری، کۆمەڵایەتی و سیاسی رۆژ لە دوای رۆژ بەرەو تەقینەوەیە و بەم پێوەرەش هەر جۆرە خۆپیشاندان و نارەزایەتی ناوخۆیی بە توندترین حاڵەت وڵام دەداتەوە.