سوعدا خەدیرزادە لە دەیەمین رۆژی مانگرتنی‌دایە

05/05/2022

بە پێ راپۆرتی ئاژانسی هەواڵدەریی کوردستان (کوردپا)، سۆعدا خەدیرزادە کە دوو گیانە و لە بەندی نسوانی زیندانی ناوەندیی شاری ورمێ دەستبەسەرکراوە لە دەیەمین رۆژی مانگرتندایە و دۆخی سڵامەتی لە مەترسیدایە.
سۆعدا خەدیرزادە خەڵکی شاری پیرانشارە و خێزاندارە و خاوەن دوو منداڵە و لە رۆژی پێنجشەممە ۲۲ رەزبەری  ساڵی ۱٤۰۰، لە لایەین هێزە ئەمنییەکانی رێژیم بە بێ نیشان دانی حۆکمی دادوەری دەستبەسەر کراوە.
دواتر لە رۆژی دووشەممە ۱۷ خەزەڵوەری ۱٤۰۰، ناوبراو لە گرتووخانەی ئیتڵاعاتی سپای پاسداران بۆ بەندی نسوانی زیندانی ناوەندی شاری ورمێ راگوێزراوە. 
پێشتر بە هۆی دیار نەبوونی هۆکاری دەستبەسەرکردنی، دوو سکاڵای بۆ دادستانی پیرانشار تۆمار کردووە و خوازیاری گۆڕینەوەی بڕیاری کاتی دەستبەسەری بە بارمتەی کردبوو، بەڵام دادستانی لە گەڵ ئەو سکاڵایە دژایەتی کردبوو.
بارودۆخی سڵامەتی ئەم هاووڵاتییە بە هۆی دوو گیانی، زەختی خوێن، تووشبوونی گورچیلەی بە نەخۆشی خراپە و مانگرتنی ئەم چەند رۆژە بارودۆخەکەی خراپتر کردووە و ئەو جۆرەی کە یەکێک لە هاوبەندییەکانی وتووە بەرپرسانی زیندان نەتەنیا دانیان بە داواکارییەکای ئەم ژنەیان دانەناوە، بەڵکوو بۆ شکاندنی ئەو مانگرتنەی خستوویانە ژێر گوشارەوە.
ئەمە یەکەم جار نییە کە هێزە ئەمنییەکانی رێژیم بە هۆکاری پووچەڵ و نادیار، هاووڵاتییانی کورد دەستبەسەر دەکەن و ئەم دۆخەش لە رۆژهەڵاتی کوردستان لە یەک مانگی رابردوو لە بەرزبوونەوەدایە.