لە پێشوازیی ٣٠ گوڵان، ساڵڕۆژی دامەزراندنی پارتی ئازادیی کوردستان و دوو ساڵەی دامەزراندنیی سپای میللیی کوردستاندا.

پێش 2 هەفتە

* کاکەڕەش لاجانی
لە کارنامەی خەباتی PAKدا، بێجگە لە داهێنانە فیکری و سیاسییەکان و بێجگە لە نەبەردە هەرگیز لە یادنەچووەکانی لە گەڵ سوپای داگیرکەری تاران لە سەر خاکی رۆژهەڵات؛ شانازیی گێڕانی رۆڵی مێژوویی لە تێکشکاندنی ئەفسانەی داعش و بەرەنگار بوونەوەی هێرشی سوپاکانی تاران و بەغدا بۆ داگیرکردنی هەولێری پایتەختی باشووری کوردستانی، تۆمار کراوە.
ئەم گوتار و ئامانج و ستراتیژ و پراکتیک و مێژووە، پارتی ئازادیی کوردستانی کردوەتە پارتێکی خاوەن ناسنامە وپەیام و بەرهەمهێنەری بەها بەرزەکان و سەرمایەیەکی سیاسی- سەربازی بۆ رۆژهەڵاتی کوردستان.
ئەم کاروانە هەتا هەڵاتنی خۆری ئازادیی نیشتمان، بێوچان بەدەوام دەبێ.
کاروانی خەباتی حیزبی فیکر و سیاسەت و پڕاکتیک و ئەدەبیاتی سیاسیی نەتەوەیی کورد، حیزبی خەونی گەورە و ئاواتی له مێژینەی کورد، حیزبی هەڵکەرەوەی ئاڵای ئامانجەکانی شێخ عوبەیدووڵڵا نەهری و سمکۆی شکاک و پێشەوا قازی محەمەد، حیزبی هاوڕەنگی ژێکاف و هیوا و خۆیبوون، حیزبی شكاندنی شەرم و تەقییەی ناسیۆنالیزمی کورد و بانگی ئاشکرای دەوڵەت و سەربەخۆیی کوردستان.
ئه‌وه‌ قه‌ڵه‌مه‌كه‌ی شەهیدی رێبەر کاک سه‌عیدی یه‌زدانپه‌نا بوو كه‌ بۆ یه‌كه‌مجار، له‌ ناسنامه‌ی داسه‌پاوی ئێرانیی به‌ سه‌ر كوردا راسا و رایگه‌یاند كه‌ : كوردین، ئێرانیی نین و ترسمان له‌وه‌ نییه‌، پێمان بگوترێ ته‌جزیه‌ ته‌ڵه‌ب. ئه‌وه‌ سه‌عید یه‌زدانپه‌نا بوو كه‌ درووشم و ستراتیژیی باوی بزووتنه‌وه‌ی سیاسیی رۆژهه‌ڵاتی كوردستانی ره‌تكرده‌وه‌ و سه‌ربه‌خۆیی وه‌ك ستراتیژیی خه‌باتی كوردی رۆژهه‌ڵات، هێنایه‌ ناو ئه‌ده‌بیاتی سیاسییه‌وه‌.
تێکۆشەرانی سپای میللیی کوردستان لە ریزەکانیPAK، کە دوو ساڵ بەر لەئێستا بەفەرمی راگەیاندرا، خەباتگێڕ و جەنگاوەری دامەزراندنەوەی دەوڵەتی جمهووریی کوردستانن.، ره‌تكردنه‌وه‌ی سنووری داسه‌پاو و ناسنامه‌ی ساخته‌ی ئێرانیی و بنده‌ستیی نه‌ته‌وه‌یین.
ماف و ئازادییه‌كانی كورد له‌ چوارچێوه‌ی ئێراندا وه‌دیی نایه‌ت. ماف و ئازادیی و به‌خته‌وه‌ریی و پێشكه‌وتن و ئاسایش و كه‌رامه‌تی مرۆڤی كورد به‌ جێگۆڕكێی نێوان ده‌سته‌و تاقمه‌كانی فارس وه‌دیی نایه‌ت:
ماف و ئاسایش و ئازادیی و كه‌رامه‌ت و په‌ره‌سه‌ندنی مرۆیی و ئابووریی و كۆمه‌ڵایه‌تیی بۆ كورد و كوردستان، له‌ گره‌وی گه‌یشتن به‌ سه‌ربه‌خۆیی و سه‌روه‌ریی و ده‌وڵه‌ت - نه‌ته‌وه‌یی دایه‌.
كه‌س بێجگه‌ له‌ رۆڵه‌كانی رۆژهه‌ڵات، مافی بڕیاردان له‌ چاره‌نووسیی سیاسیی رۆژهه‌ڵاتی كوردستانی نییه‌.بۆ ئەمەش تاکە فاکتەر رێفراندۆمێکی ئازاد و گشتگیر دەبێ.
لەپێشوازی ئەم رۆژە مێژووییەدا، و بەتایبەتی دووساڵەی دامەزراندنی سپای میللیی کوردستان، سلاو دەنێرم بۆ رێبەری کاریزما و جنڕاڵی مەزنی رۆژهەڵات و هەموو فەرماندەو پێشمەرگەکانی سپای میللیی کوردستان.
سڵاوی ئەمەگ و وەفاداری بۆ ئەو پارتەی کە باوەڕی بە سنوورە دەستکردەکان نییە و لەکوێ پێویست بێت بە روحێکی نەتەوەیی ئامادەی بەرگرییە.
پیرۆز بێت لە بنەماڵەی شەهیدان و زیندانیانی سیاسیی و نەتەوەی کورد لە رۆژهەڵاتی کوردستان.