بەرپرساییەتێکی هەستیار لە خەباتێکی بێ وچان

22/06/2022

ئاکۆ محەمەدی
لە چەند ساڵی ڕابردوودا مەترسیدارترین سازمانی تێروریستیی جیهان بەناوی داعش هێرشی کردە سەر خاکی پیرۆزی کوردستان و چ لەباری ژئۆپۆلۆتیک چ لە باری ئەمنی ستراتژیک بە گشتیی ، مەترسییەکی گەورەی خستە سەر کوردستان. داگیرکارییەک بە شێوەی تێرۆر و رەشە کوژی و تەجاوز کە هەموو پێکهاتە نەتەوەیی و ئایینی و کەلتووری و تەنانەت رەگەزییەکانیشی دەگرتەوە؛ جا لێرەدا بە هۆشیاریی نەتەوەیی و سۆزێکی ناسیونالیزمیی بە هێز و چڕوپڕ و دڵێکی بەرفراوان، پارتی ئازادیی کوردستان بە فەرمانی فەرماندەی گشتیی جەنابی ژنڕاڵ حسێن یەزدانپەنا جووڵە بە لەشکری لێهاتووی رۆژهەڵات  کرا و لە هێڵەکانی بەرگری روو بە دوژمنان و هێزەکانی دژی نەتەوەکەمان ئامادە بوون.
بەخۆشییەوە و بە شاهیدی دۆست و دوژمن و چاوەدێرانی ناوخۆیی و تەنانەت میدیای وڵاتانی بەشدار و هاوپەیمانانی نێودەوڵەتی، PAK توانی بەشێک لە چارەسەر و بەرگری بێ و لە کاری مەیدانی و هاوبەش لەگەڵ هێزەکانی دیکەی پێشمەرگە و هاوپەیمانیی نێودەوڵەتی‌دا ئیعتبار و متمانەی خەڵک چ لە باشوور و چ لە رۆژهەڵاتی کوردستان بە دەست بێنێ و بیسەلمێنێ کە میراتگری راستەقینەی کۆماری کوردستانە و بەرهەمی تەجروبیات و راست کەرەوەی خەباتی بەلارێداچوو لە رۆژهەڵاتی کوردستان بێ؛ هاوکات 
رەتکردنەوەی سنوورە دەسکردەکان بە رۆڵگێڕانیان لەپاراستنی کیانی سیاسیی باشووری کوردستان درێژەی ئەو هاوکاری و سنوورنەناسییە بێت کە رۆڵەکانی باشوور لەکۆماری کوردستان گێڕایان.
لەماوەی ئەم چەند ساڵەی شەڕی داعش‌دا کۆمەڵێک دەسکەوتی سیاسی و نیزامی و ئەمنی هاتە ئاراوە ، ئەم دەسکەوتانە بەرهەمی خوێنی فیداکارانی خاک و نیشتمان و کاروتێکۆشانی کوڕگەل و کچ گەلی ئازا بوو کە لە قوتابخانەی PAK و بە تایبەت ئامۆژگاری و وتە بەنرخەکانی سەرکردەی شەهید کاک سەعیدی یەزدانپەنا بوو کە بیری سەربەخۆیی بۆ کورد و بەرگری لە هەموو خاکی کوردستانی بە پێویست دەزانی و بەخۆشییەوە ئەم ئەرکەش بە باشی بە ڕێوە چوو و قۆناغێکی دیکە لەو خەباتە بێ وچانە بە سەر بەرزی بە ئەنجام گەیی.