لە بری ئەوەی باسی شەری داهاتوو بکەین،لێم گەرێن با من باسی شەڕی رابردوو بکەم

22/06/2022

جوامێر شادی
رۆژهەڵاتی کوردستان،پارچەیەکی کوردستانە کە تەواوی لاپەرەکانی میژوو باسی دەکەن،جوغرافیایەکی دەوڵەمەندە لە فیداکاری و جوامێری.
خاوەنی چەندین سەرکردەی ئازا و بوێر و ناودار بووە کە توانیویانە لە کاتی سەرکردایەتی شۆڕشەکانیان وەکوو فەرماندەی مەیدانی و سیاسی و نیزامی داگیرکەرانی کوردستان بە زاڵە بێنن.
لە رۆژهەڵاتی کوردستان ماڵێک نییە کە بەشێک نەبێت لە مێژووی رزگاریخوازی نەتەوەی کورد و ئێستاش درێژەدەری ئەو رێگایەن.
کۆماری کوردستان بەرهەمی خوێن و فیداکاری و گیانبازی سەرکردە و شەهیدانی رێگای  سەربەستی کوردستان بوو کە لەسەر دەستی پێشەوا قازی محەممەد دامەزرا.
لە دوای لە سێدارەدانی جەستەیی قازی محممەد، بیر و باوەڕ و ئیرادەی پێشەوا، وەکوو رێبەرێک و رێبازێک لە ناو دڵی خەڵکی کوردستان ماوەتەوە و بووە سیمبۆڵی ئازایەتی و فیداکاری.
لە دوای کۆماری کوردستانەوە هەتا دامەزرانی پارتی ئازادیی کوردستان و سپای میللیی کوردستان،بۆشاییەکی سیاسی،رێبەرایەتی،ئەمنی،پەروەردەیی و ناسنامەیی باڵی کێشا بە سەر رۆژهەڵاتی کوردستان و دەستی کرد بە خەساندنی رێگا و رێبازی گەورە پیاوانی کورد.
رۆژهەڵاتی کوردستان بوو بە سەرچاوەی هزری چینایەتی و خەباتی دژی ئێمپریاڵیستی و خەبات بۆ برایەتی گەلان،بە ون کردنی ناسنامەی نەتەوەیی و بە لاڕێ‌دا چوون لە رێبازی سەربەخۆیی.
خەباتی سیاسی و چەکداری و مەدەنی خەڵکی رۆژهەڵات و ئەحزاب تایبەت بوو بە وەدەست هێنانی مافی کرێکار و سەلماندنی ئێرانی بوون و کەوتنە شەڕی ئەوەی کە ئایا فارسەکان ئێرانی ترن یا کوردەکان.
لە کاتە هەستیار و چارەنووس سازانە دا،کە کوردی رۆژهەڵات لە ئاواتی سەربەخۆبوون،گەیشتە بێ هیوایی و خەساربوون،دەرفەتەکانی بە ئاکام گەیاندنی خەباتی چەند سەدساڵەی کورد،یەک لە دوای یەک لە کیس دەچوو و بازاری حزبایەتی گەرم و گوڕتر دەبوو،هەتا ئەو رادەیە کە شەڕی براکوژی و ئێنشەعاب و خۆسەپاندنی ئەحزاب بە یەکدی دەستی پێ کرد.
لەم چەند دەیە بۆشاییەدا هیچ خسارناسییەکی ئەوتۆ رووی نەدا لە لایان هیچ کام لە لایانە سیاسییەکانەوە،هەتا وەک چۆن بڵێی مۆعجزەیەک روویدا بێت،شەهید سەعیدی یەزدانپەنا،شەهید تەمەن 27ساڵەی کوردستان،ئەو خەسارناسییەی بە دامەزراندنی پارتی ئازادیی کوردستان بۆ پڕکردنی ئەو بۆشاییەی چەند دەیەی رابردوو دامەزراند و بۆ جارێکی‌تر ناسنامە و رێبازی نەتەوەیی و نەتەوە پەروەری هێنایەوە گۆڕێ.
شەڕی داهاتووی ئێمە لە رابردوومانە، پارتی ئازادیی کوردستان و سپای میللیی کوردستان بە درێژەدانی رێگای سەربەخۆیی،سوورە لە سەر ئەوەی کە مافی کرێکار و مافی ژن و خەبات دژی سەرمایەداری و برایەتی گەلان،هەمووی لە  چوارچێوەی دەوڵەتیکی ئازاد و سەربەخۆی کوردستان وەدی دێت و کورد لە کاتێکدا بوو بە خاوەن سەروەری و سەربەخۆیی،دەتوانێ مافی هەموو گەلان،لە چوارچێوەی دەوڵەتی کوردستان بپارێزێت و دانووستاندن لەگەڵ داگیرکەران تەنیا لە کاتێکدا دەبێت کە وەکوو دوو جیران پێکەوە سازش بکرێت لە حاڵەتێک دا کە سێبەری هێز لە سەر مێزی گفتوگۆدا ئامادەبێت.
پارتی ئازادیی کوردستان و سپای میللیی کوردستان شەڕی داهاتوو دەکەن بۆ گەیاندنی نەتەوەی کورد بە سەروەری و سەربەخۆیی و بێجگە لە سەربەخۆیی کوردستان هیچ رێگا چارەسەرێ بۆ دۆزی کورد نابیننەوە.