بڕیارنامەی کۆبوونەوەی مەجلیسی گشتییPAK سەبارەت بە حەولەکانی پاراستنی دەوڵەت-نەتەوەی ئێران و سەروەریی سیاسیی فارس

23/06/2022

بە سەرنجدان بەوەی:
١- هاوکات لە گەڵ چەقینی تاران لە زونگاوی قەیرانە فرەچەشنەکان، بەرتەسک بوونەوەی دەرفەتی دەرباز بوون لێیان و لاواز بوون و هەڵوەرینی پێگە کۆمەڵایەتییەکەی و پەرەگرتنی شەپۆلی ناڕەزایەتییەکان لە شێوازی خۆپیشاندان و مانگرتن و چالاکییە سێمبۆلیکەکانی بەرهەڵستیی ڕێژیم؛ گرووپ و ڕێکخراو و ڕەوتە سیاسییەکان،بە ڕوانگە و پڕۆژە و ئالترناتیڤی جۆراوجۆرەوە کەوتوونەتە جووڵە؛

٢- پاشماوەکانی بنەماڵەی پەهلەوی و لایەنگرانی گەڕانەوەی سیستەمی پاشایەتی بۆ ئێران بە سەرکردایەتیی «ڕەزا پەهلەوی»، کە زیاتر لە ٤ دەیەیە لە تاراوگە دوور لە خەم و ئازارەکانی خەڵک دەژین، لەم کاتەدا زیاتر لە گرووپ و ڕەوتەکانی دیکە دەرکەوتوون و زەق کراونەتەوە.لە تەنیشت ئەم ڕەوتە ، تاقمی «شۆرای مودیریەتی گوزار» بە سەرکردایەتی «حەسەنی شەریعەتمەداری» دەبیندرێ.
پلان و ستراتیژی ڕەزا پەهلەوی و تاقمی شۆرای مودیریەتی گوزار ئەوەیە کە ئەو دەوڵەتەی بە ناسنامە و سەروەریی و سەرداریی نەتەوەی فارس بە سەر کورد و نەتەوە نەفارسەکانی دیکەدا بۆ «ڕەزا ماکسیم» دامەزرا و لە ساڵی ١٣١٤ی هەتاوی(١٩٣٥ز)ناوەکەیان لە «پێرشیا»وە گۆڕی بۆ ئێران؛ لە گۆڕانکارییەکانی سیستەمی سیاسیی ئێراندا تێکنەچێت و هەر بەو جۆرە وەک خۆی بمێنێتەوە. بە «عەشیرەت و خێڵ» دانانی کورد وجیاکردنەوەی ئەڕتەش لە مەکینەی شەڕ و تاوانی سیستەمی گشتیی کۆماری ئیسلامی لە لایان ڕەزا پەهلەویی و بە «قەوم» پێناسە کردنی کورد و ئاماژە بە «ئەڕتەشی تەیار بە چەکی پێشکەوتووی نەتەوەی هەشتا ملیۆنی ئێران» لە لایان حەسەنی شەریعەتمەدارییەوە، دۆخی کورد لەو  ئێرانە «دێموکراتیک»ەی ئەوان بانگەشەی بۆ دەکەن،دەردەخات. ئەوان بە تەمان وەک ڕەزاشا، بە ناوی مۆدێڕنیزاسیۆنەوە، هەموو ناسنامە نەفارسەکان بە پێناسەکردنیان بە خێڵ و عەشیرەتی لاسار و لادەر لە مۆدێڕنیزاسیۆن، لە ژێر زنجیری دەبابەکانی ئەڕتەشە پۆشتە و پەرداخە حازر و دەست لێنەدراوەکەیاندا، بپلیشێننەوە؛

٣- لە کۆنگرەی پژاک لە ئورووپا، لە توێی پەیامێکی بەڕێز عەبدووڵلا ئۆجالاندا ڕاگەیندرا کە: «پژاک لە چوارچێوەی مۆدێڕنیتەی دێموکڕاتیک دا ئافرێنەری ئالترناتیڤ دەبێت بۆ یەکێتی و یەکپارچەیی ئێران». لە خاڵی چوارەمی ڕاگەیەندراوی کۆتایی کۆنگرەکەدا پژاک قەوارەی دەوڵەت-نەتەوە بە بنەمای پێکەوە ژیانی گەلان دادەنێت. لەم گوتارەدا، پژاک نەک هەر خوازیاری پاراستنی یەکێتی خاکی ئێرانە، بەڵکوو خۆی و کورد ئەرکدار بەو ئەرکە دەکات؛ 

٤- حیزب و لایەنە کوردستانییەکانی هەڵگری ستراتیژیی فیدڕاڵیزم و دێموکراتیزەکردنی ئێران، لە گەڵ ئەوەدا کە لە سەر دێموکراسی لە ئێران و ڕەتکردنەوەی سیستەمی پاشایەتی پێدادەگرن، بەڵام لە بناغەڕا نە ئەسڵی سەروەرییان وەک ماف و وەک پێویستیی بۆ کورد مەبەستە و نە کۆتایی هێنان بە دەوڵەت- نەتەوەی ئێران و سەروەریی سیاسیی فارس. ئەوان لە بانگەشەی سیستەمی دڵخوازیاندا، پێ لە سەر ئەوە دادەگرن کە فیدرالیزم «یەکێتی خاکی ئێران» دەپارێزێت. لەم پرێسپێکتیڤەدا کورد لە نەتەوە بوون دادەماڵڕێت و لە مافی نەتەوەیی و سەروەریی سیاسیی بێبەش دەکرێت؛ دەخرێتە جێگای کەمینەیەکی ئەتنیکی کە لە چوارچێوەی دەوڵەت-نەتەوەی ئێران بە سیستەمی دێموکراسی فیدراتیو، داوای هێندێک مافی خۆبەڕێوەبەریی لە نەتەوەی سەردەست دەکات. سەرنجڕاکێش ئەوەیە کە هەر ئەو تاقم و گرووپە ئێرانییانەی کە ئەم بەشە لە حیزب و لایەنە کوردییەکان، بۆ بەهێز بوون و بە ئاڵترناتیڤ بوونیان حەول دەدەن، تەنانەت لە تاراوگە و بێدەسەڵاتییدا، ئەم داواکارییە داشکێندراوە قبووڵ ناکەن؛

بۆیە پارتی ئازادیی کوردستان پێ لەسەر ئەم خاڵانە دادەگرێت:
١- ئەو دەوڵەت- نەتەوەیەی بۆ ڕەزا ماکسیم(کە دوایە کرایە ڕەزا شا)، بنیاتنرا و ناسنامەی فارسی بەبەردا کرا، لە یەک سەدەی ڕابردوودا لە هەر دوو سیستەمی پاشایەتی و کۆماریی دا، مایەی قەیران، میلیتاریزم، تووتالیتاریزم و هۆکاری سەرەکیی هێرش و داگیرکاری و کوشتار و تاڵان و هەژاریی و نەخۆشیی و کۆچ و کۆی ئەو کارەساتانە بووە کە بە سەر کورد و نەتەوە نەفارسەکانی دیکەی بندەستی تاران دا هاتووە. ئەو قەوارەیە ئەگەر لە هەلومەرجێکی دیار و ئاستێک لە پارسەنگی هێزدا وەک نموونەی عێڕاق، بۆ ماوەیەک کارکردی جیاواز لە ناسنامەکەی هەبێت، دواتر بە گۆڕانی هەلومەرج، دەچێتەوە سەر ڕێڕەوی راستەقینەی خۆی. بۆیە بەردەوامیی قەوارەی دەوڵەت-نەتەوەی ئێران و سەروەریی سیاسیی نەتەوەی فارس، بە هەر سیستەمێکی سیاسییەوە: پاشایەتی یان کۆماری، تووتالیتێری یان دێموکراسی، سێکۆلار یان تیۆکراتی، واتا بەردەوامیی کارەساتەکانی یەک سەدەی پێشوو و بێ ئەنوایی سیاسیی کورد.

٢- ئەوەی لەو یەک سەدەیەدا دەرفەتی بە تاران داوە هێرش بکاتە سەر ڕۆژهەڵاتی کوردستان و کوشتار وەڕێبخات، سەرکردەکانی لە ناوبەرێت، سامانەکەی تاڵان بکات، پلانی ئاسمیلاسیۆن و فارسیفیکاسیۆن بەرێوە بەرێت و بیکاتە کۆڵۆنییەک؛ بێ بەشیی کورد لە سەروەری سیاسیی و دەوڵەت بووە. لە داهاتووشدا تەنیا سەروەری و دەوڵەتی سەربەخۆ دەتوانێ کۆتایی بە کۆڵۆنیی بوونی کوردستان بێنت و ئاسایشی کورد و کوردستان لە هێرش و داگیرکاریی دەستەبەر بکات. کۆمەڵگای نێودەوڵەتییش ئەو  نەتەوانە دەپارێزێت کە خاوەن دەوڵەت و سەروەرین و یەکەیەکی ئەندامن لە کۆمەڵگای نێودەوڵەتییدا.

٣- لە ماوەی ئەو یەک سەدەیەدا، لە چوارچێوەی هیچ دەوڵەت-نەتەوە و ئیمپراتۆرییەک لە شێوەی دەوڵەتی فارسدا، هیچ نەتەوەیەکی بێ بەش لە سەروەریی و دەوڵەت، بە ئازادیی و دێموکراسی و پێشکەوتن و بەختەوەریی نەگەیشتووە. بەها و خەونە گەورەکانی نەتەوەکان لە چوارچێوەی دەوڵەتی نەتەوەیی خۆیاندا وەدیی دێن و دێموکڕاسییش بە بێ گۆڕانکاریی لە سنوورە دەسکرد و داسەپاوەکان، وەدیی نایەت.نموونەکانی ئەم هەقیقەتە، نەتەوەکانی ناو یەکێیتی سۆڤییەتی پێشوو، یۆگوسڵاوی، ترکیا، سووریا  و  عێڕاقی بەناو فیدڕاڵی پەرلەمانی ئەمڕۆیە!

٤- ئێستا کە بناغەکانی دەوڵەت-نەتەوەی ئێران و سەروەریی سیاسیی فارس، لە ئاکامی قەیران و ناکارامەییەکانی خۆی و کاریگەرییەکانی بەجیهانیبووندا، لەرزۆک بوون و لە هێندێک ڕەهەندەوە دەرفەتی هەڵوەشانەوە و کۆتایی هاتنیان خوڵقاوە و ڕۆڵەکانی نەتەوەی کورد، لە ئاستێکی بەرزتری هوشیاری نەتەوەیی و سیاسییدان؛ ڕەوا نییە و کارەساتخوڵقێنە، تاک و گرووپ و حیزبی سیاسیی کورد، لە هەر فۆرم و قەوارەیەکدا، بەشداریی بکات لە حەولەکانی پاراستنی یەکێتی و یەکپارچەیی و بەردەوامیی دەوڵەت-نەتەوەی ئێران و سەروەریی نەتەوەی فارس. ئەرکی هەرە لە پێش و گەوهەری کوردایەتی، هەڵگرتنی تەوقی سەروەریی دەوڵەتی فارس لە سەر خۆی و خاکەکەی و وەدەست هێنانی سەروەریی و سەربەخۆیی و بنیاتنانی دەوڵەتی دێموکراتیکی کوردستانە.
  پارتی ئازادیی کوردستان بە دەربەستیی لە حاست یەک سەدە خوێن و خەبات و مەینەتی ڕۆڵەکانی کوردستان، بە پشت بەستن بە ڕەوایی مافە نەتەوەییەکانمان و سوور بوون لە سەر ناسنامەی نەتەوەیی، خەباتی شێلگیرانە بۆ کۆتایی هێنان بە سەروەریی ئێران لە سەر کوردستان و گەیشتن بە سەروەریی و سەربەخۆیی کوردستان؛ بەربەرەکانی لە گەڵ هەموو حەولەکانی بەردەوامییدان بە دەوڵەت-نەتەوەی ئێران و سەروەریی سیاسیی فارس دەکات. 


پارتی ئازادیی کوردستانPAK
مەجلیسی گشتیی

٢ی پووشپەڕی ٢٧٢٢ک
٢٣ی ژووئەنی ٢٠٢٢ز