پەیامی رێکخراوی لاوانی ئازادیی کوردستان بەبۆنەی رۆژی جیهانیی لاوان لاوان مێشک و بازوو و پێشەنگی خەباتی رێگای سەربەخۆیی کوردستانن

12/08/2022

پەیامی رێکخراوی لاوانی ئازادیی کوردستان RAK بەبۆنەی رۆژی جیهانیی لاوان
لاوان مێشک و بازوو و پێشەنگی خەباتی رێگای سەربەخۆیی کوردستانن

لاوانی تێکۆشەری کورد!
کچان و کوڕانی ماندوویی نەناس!
12 ئۆگێست رۆژی جیهانیی لاوانە و ئەم رۆژە لە  17 دێسامبەری 1999ـەوە لەلایان کۆمەڵەی گشتیی نەتەوە یەکگرتووەکانەوە دیاریی کراوە.  
لاوانی نەتەوەی کورد تەنیا لەناو دەوڵەتی نەتەوەیی خۆیان‌دا دەرفەت و دەرەتانی گەشەکردن و گەیشتن بە مافەکانیان هەیە.
لاوانی کورد وەک کۆڵەکەیەکی سەرەکیی نەتەوەی کورد ئاکامە تفت و تاڵەکانی داگیرکراویی نەتەوە و نیشتمانەکەیان پێوە دیارە و زیاتر لە هەر پێکهاتەیەکی دیکە لەژێر گوشاری پیلان و سیاسەتی داگیرکەراندان. دەوڵەتی داگیرکەر بە سیاسەت و پیلانی جۆراوجۆری ئاسمیلاسیۆن، گرتن، لێدان، کوشتن، برسیکردن، تێکدانی باری دەروونی و گیرۆدەکردنیان بە مادەی هۆشبەر و کۆت و بەندکردنی سەرجەم ئازادییە مەدەنی و رێکخراوەییەکان و دەیان تاوانی دیکە لاوانی ئەم نەتەوەیەیان لە سەرجەم مافەکانیان بێبەشکردووە.
یەکدەنگی و یەکڕیزی و گوتاری هاوبەشی لاوان و کۆوەبوونیان لەژێر ئاڵای کوردستان و خەباتی هاوبەشیان بۆ بەدیهێنانی سەروەریی سیاسی و سەربەخۆیی کوردستان تاکە رێگایە بۆ دەستەبەرکردنی سەرجەم مافەکانیان. دابینکردنی گشت مافەکانی تاک و کۆی کورد لە گرەوی ئازادی و سەربەخۆیی کوردستاندایە و دەستەبەرکردنی سەرجەم ماف و داخوازییەکانی لاوانی کورد پەیوەستە بەوەوە.
رێکخراوی لاوانی ئازادیی کوردستان RAK لە رۆژی جیهانیی لاوان‌دا پیرۆزبایی لە سەرجەم لاوانی کوردستان بەگشتیی و بەتایبەتیی کچان و کوڕانی ریزەکانی سپای میللیی کوردستان و پارتی ئازادیی کوردستان دەکات، کە ئازایانە شانیان داوەتەبەر بەرپرسایەتی نەتەوەیی و نیشتمانییان و تا راماڵینی دواسەربازی داگیرکەر لەسەر خاکی کوردستان وچان نادەن و رێخۆشکەر و رچەشکێنی رێگای ئازادیی و سەربەخۆیی کوردستانن.

رێکخراوی لاوانی ئازادیی کوردستان RAK
21 گەلاوێژی 2722
12 ئۆگێست 2022