پەیامی بەڕێزان کاک رەئووف کەعەبی و کاک عەتا حسەینی، بە بۆنەی چلەمین ساڵوەگەڕی شەھیدبوونی قارەمانی نەبەردە سەختەکان: کاک ڕەشید یەزدانپەنا( سمکۆ)

12/09/2022

بە بۆنەی چلەمین ساڵرۆژی گیانبەختکردنی پێشمەرگەی کوردستان، ڕەشید یەزدانپەنا (سمکۆ) 

لە ئێوارەی ۲۱ی خەرمانانی ساڵی ۱۳۶۱ی هەتاوی، پەلێک لە پێشمەرگەکانی لقی کوردستانی سازمانی چریکەفیداییەکانی خەڵکی ئێران (ئەقەلیەت) بە مەبەستی هێرش کردن بۆ  سەر بنکەکانی پاسدار و جاش، خۆیان گەیاندە ناو شاری بۆکان و لە چەندین مەیدان و شەقامی ئەو شارەدا جێگیر بوون.
فەرماندەی ئەو پەلە پێشمەرگەیە هاوڕێ ڕەشید یەزدانپەناە ناسراو بە «سمکۆ» بوو.
لە یەکێک لە چوارڕێیەکان پاش تێکهەڵچوونێک لە گەڵ دەستەیەک پاسدار و جاش، کاک سمکۆ دەکەوێتە بەر دەسڕێژی ئەوان و گیانی بەخت دەکات .
هاورێیانی کاک سمکۆ پاش شەرێکی قۆرس، نەیانهێشت تەرمە پیرۆزەکەی بکەوێتە دەستی دۆژمنان چۆنکوو پاش گیانبەختکردنی کاک سمکۆ، هەموو هاورێیان بڕیاریاندا کە بێ تەرمی ئەو، شاری بۆکان بە جێ نەهێڵن.  فەرماندەیی پێشمەرگەکان بۆ هێنانەوەی تەرمی کاک سمکۆ کەوتە ئەستۆی زیندوویاد ئەمیر شەمسەدینی کە هاوفەرماندە و هاوڕێ و دۆستی کاک سمکۆ بوو.

لەو سەردەمەدا، شارەکانی کوردستان داگیرکرابوون و هێزەکانی ڕژیمی داگیرکەر بەردەوام هێرشیان بۆ سەر ناوچە ئازادەکان دەکرد. لەوەها هەلومەرجێکدا، هێزی پێشمەرگەی کورستان بە پانتایی کوردستان بەردەوام شەوانە خۆیان دەگەیاندە شارەکان و زەبری گەورەیان لە هێزەکانی ڕژیم دەوەشاند. هاوکات لە گەڵ دەیان و سەدان شەڕی دیکە لە ناوچەکانی کوردستان، هێزی پێشـمەرگە هاوکات لە گەڵ خەبات و بەرخۆدانی خەڵک، قارەمانانە لە بەرامبەر دەسەڵاتی نگریسی ڕژیم وەستانەوە و میراتێکی گرینگیان لە بەرخۆدان بۆ دواڕۆژ بەجێهێشت. 
بەڵام هەموو ئەو دەسکەوتانەی ئێستا، بێ گیانبازیی و لەخۆبردوویی کەسی وەک ڕەشید یەزدانپەنا مسۆگەر نەدەبوون.

هاوڕێ سمکۆ کەسایەتییەکی خۆشەویستی شار و ناوچەی بۆکان و هەروەها هەموو هاوڕێیانی بوو. ئەو یەکێک لەو ڕۆلەفیداکارانەی گەل بوو کە زۆر زوو گیانی ئازیزی لە پێناو بەرگری لە گەل و نیشتمان و هەروەها لە پێناو ئامانجە بەرزەکانی  ئازادی و یەکسانی بەخت کرد.
گەلی قارەمان پەروەری کورد قەت یادی ئەو لە بیری ناکات.

لە چلەمین ساڵرۆژی گیانبەختکردنی کاک ڕەشید یەزدانپەنا «سمکۆ»، هاوکات لەگەڵ یادکردنەوە لە ژیان و خەباتی ئەو کەسایەتییە شۆڕشگێڕ و تێکۆشەرە، لە فیداکاری، خەبات و خۆراگری و شۆرشگێری دایکی ئازیزی، زیندوو یاد «دایە ئامینە»  و هەروەها لە ژیانی کۆرت بەڵام پڕلە خەبات و تێکۆشانی شۆڕشگێرانەی ئەندامێکی دیکەی ئەم بنەماڵە سەربەرزە، هاوڕێ کاک سەعید یەزادانپەنا ڕێز دەگرین.

لەم ڕۆژەدا و بە بۆنەی هەموو ئەو بیرەوەریانە، جارێکی دیکە ڕێز و حۆرمەتی خۆمان پێشکەش هەموو بنەماڵەی گەورەی یەزدانپەنا دەکەین.
عەتا حۆسەینی
ڕەئووف کەعبی
۲۱ ی خەرمانانی ۱۴۰۱
۱۲ سێپتامبر ی ۲۰۲۲