«موعتەمدین»داعشی وەزاڵە ھێنابوو

13/09/2022

«موعتەمدین»داعشی وەزاڵە ھێنابوو

رزگار عەباسزادە

 لە هێزی خۆشەوی خەلیل_پارتی ئازادیی کوردستان لە چیای باشیک کە شوێنێکی ستراتیژیمان بەدەستەوە بوو و ئەگەر ھەموو رۆژێک شەڕ نەبوایە دوو رۆژ جارێک شەڕ بوو. شەڕی ھاوەن و کاتیۆشا و دۆشکا کە رۆژانە بەردەوام بوو. لەو ماوەی سێ ساڵ داعش ھەرچی ھێرشیان کرد بۆ سەرکەوتن بۆ سەرچیاکە، ھەر دەشکان و دەیان کەلاکیان لە دوای خۆیان جێدەھێشت. لە ٢٠١٤ ھەتا کۆتاییەکانی ٢٠١٦ زیاتر لە ٢٥ جار ھێرشیان کرد و ھەر شکان. ھەر کات بڕیاری گرتنەوەی شوێنێک دەدرا دەبوا جەبھەکە بە تێکڕا پێشڕەوییان کردبا و ھێرشی پێشمەرگە بۆ باشیک پەیوەست بوو بە گرتنەوەی موسڵ، ھەر لەبەر ئەو ھۆکارە داعش پشتوێنی خاترجەمی لێ شل کردبۆوە. 
 سەرەرای ئەوەش ئێمە دەستەوەستان نەوەستاین و بە ھەماھەنگی مێحوەر و ھێزی ھاوپەیمانان ھەر ناوە جارێک تیمێکی چەند کەسی دادەگژاینە خوار لێیان و لە کەمینێکدا چەند کەسێکمان لێ دەکوشتن. 
بۆیە ناوی ھاوپەیمانانم ھێنا لەبەر ئەوە جەبھەکانی ھێزی پێشمەرگە دیاری کراوبوو و لە ئەگەری گەڕانی فرۆکەی شەڕکەری ھاوپەیمانان بەسەر ئاسمانی ناوچەکەدا ھەر کەس یان ھێزێک لە دەرەوەی خەتی ھێزی پێشمەرگە بوایە بوردوومان دەکرا. پاش گیرانی ئەمیرێکی داعش لە یەکێک لە جەبھەکانی شەڕ کە پێشتر فەرماندەیی باشیک و خازری لە عۆھدەبوو، دەرکەوت ھێزی داعەش لێمان تۆقیون و لە موسڵ بە بەشداری دەیان ئەمیری داعش نەخشە رێگای ھاتنەسەرێ لە چیاکەیان دارشتبوو و لەو کۆبوونەوەیەدا پێشمەرگەکانی پارتی ئازادیی کوردستان یان بە (موعتەمدین) ناو ھێنابوو باسیان کردبوو کە ئەو ھێزە ھێزێکی پارچەیەکیتری کوردستانن و بەشداری ئەم شەڕەیان کردووە و جێی متمانەی حکوومەت و خەڵکی کوردستانن ھەر بۆیە ئەو ناوەیان لێ نابووین. موعتەمدین بە مانای جێی متمانە  یان باوەڕپێکراوەکان دێت.