بەریتانیا: پێویستە ئێران تۆپبارانی هەڕەمەکی بۆسەر شارۆچکە کوردییەکان بوەستێنێت

28/09/2022

بەریتانیا پشتویانی خۆی بۆ حکومەتی هەرێمی کوردستان دەردەبڕێت دەڵێت: "پێویستە ئێران تۆپبارانە هەڕەمەکییەکانی بۆ سەر شارۆچکە کوردییەکان بوەستێنێت."

تارق ئەحمەد، وەزیری دەوڵەتی بەریتانیا بۆ کاروباری رۆژهەڵاتی نێوەڕاست لە راگەیێندراوێکدا دەڵێت: "پێویستە ئێران تۆپبارانی هەڕەمەکی بۆ سەر شارۆچکە کوردییەکان بوەستێنێت کە بووەتە هۆی کوژرانی خەڵکی بێتاوان و زیانی بە ژێرخانی سڤیل گەیاندووە."

وەزیری دەوڵەتی بەریتانیا دەشڵێت: "ئەم هێرشانە پێشێلکارین دژی سەروەری و یەکپارچەیی خاکی عێراق و بە هەموو شێوەیەک رەتدەکرێنەوە."

هێرشە دۆرنی و مووشەکییەکانی رۆژی چوارشەممەی سوپای پاسدارانی ئێران بۆ سەر بنکە و بارەگاکانی پارتەکانی رۆژهەڵاتی کوردستان، بە گوتەی وەزیری دەوڵەتی بەریتانیا بۆ کاروباری رۆژهەڵاتی نێوەڕاست، "شێوازی دووبارەبووەوەی چالاکییە تێکدەرەکانی ئێران لە ناوچەکەدا پێشاندەدەن."

ئەو بەرپرسە بەریتانییە پاڵپشتیی وڵاتەکەی بۆ هەرێمی کوردستان دەردەبڕێت و دەڵێت: "ئێمە شان بەشانی حکومەتی هەرێمی کوردستان لە سەرکۆنەکردنی ئەم هێرشانە دەوەستینەوە و بەردەوام دەبین لە پشتیوانیکردنی سەروەری و ئاسایشی عێراق، بە هەرێمی کوردستانیشەوە."

لە ئەنجامی هێرشەکانی ئێران بۆ سەر بارەگای پارتەکانی رۆژهەڵاتی کوردستان لە کۆیە، زڕگوێز و شێراوە لانیکەم 11 کەس کوژران و 47ی دیکەش برینداربوون.