بڕیارنامەی مەجلیسی گشتیی پارتی ئازادیی کوردستانPAK بۆ پێداگرتنەوە لە سەر پێویستیی یەکڕیزیی و دامەزراندنی بەرەی کوردستانی

پێش 2 هەفتە

بڕیارنامەی مەجلیسی گشتیی پارتی ئازادیی کوردستانPAK 
بۆ پێداگرتنەوە لە سەر پێویستیی یەکڕیزیی و دامەزراندنی بەرەی کوردستانی
   لە ٣٣ ساڵی ڕابردوودا، لە ڕاگەیەندراوی دامەزراندنی پارتی ئازادیی کوردستانەوە هەتا ئێستا، بایەخدان بە پرسی یەکڕێزیی و پێویستیی پێکهێنانی بەرەی کوردستانی، بەشێکی زۆر لە قەبارەی سیاسەت، پێوەندیی و ئەدەبیاتی سیاسی و هەڵسووڕانی میدیایی پارتی ئازادیی کوردستان بووە.بەڵام ڕاپەڕینی ژینا، ئەو پرسەی کردووەتە بابەتێکی هەنووکەیی و ویستێکی گشتیی ڕەوای کوردستانیان. 
بۆیە بە سەرنجدان و بایەخدان بەوەی: 
١- بەردەوامیی و سەرکەوتنی ڕاپەڕینی ژینا، پێکهێنانی یەکڕیزیی سیاسی و یەکخستنی گوتار و سیاسەتی هاوبەشی کوردستانیی پارت و لایەنە سیاسییەکانی ڕۆژهەڵاتی کوردستانی کردووەتە پێویستیەکی گرینگ و هەنووکەیی؛

٢- خەسارەکانی نەبوونی یەکڕیزیی سیاسیی کوردستانی و نەبوونی هەڵوێست و هەڵسووکەوتی یەکگرتووانە لە سەر ڕاپەڕینی ژینا و رووداوەکانی ڕۆژانەی، بێدەربەستی و خەمساردییەکی ئەوتۆیە کە هەرگیز لە ئاست زەبر و زەنگ و پیلانگێڕییەکانی دوژمنی داگیرکەر دژی ڕۆڵەکانی نەتەوەکەمان و ئەو فیداکارییانە نییە کە ژنان و پیاوانی ڕۆژهەڵاتی داگیرکراو، دەیخوڵقێنن؛

٣- پێکنەهێنانی کۆبوونەوەیەکی فراوانی هاوبەشی پارت و ڕێکخراوە سیاسییەکان لە جەنگەی ڕاپەڕین و ڕووداوە گەرمەکاندا بۆ داڕشتنی پلان و سياسەتی هاوبەش و هاوکاریی بە کردەوە بۆ بەهێز کردنی ڕاپەڕینی ژینا؛ نەک هەر لە ئاست دەوری پێشەنگ و پڕ فیداکاریی کوردستان لەو ڕاپەڕینەدا نەبووە، بەڵکوو ناکۆکی و  مەودای نێوان پارت و لایەنە سیاسییەکان خۆیان و کەلێنی نێوان خەڵک و پارتە سیاسییەکانی لە لایەکی دیکەوە، بەرینتر کردوە؛

٤- فرە حیزبیی و هەبوونی هێزی چەکداری جیاوازی حیزبیی لە نەبوونی رێککەوتنی هەمووانیی و چەتری یەکگرتووی پارتە سیاسییەکان و قەوارەیەکی یەکگرتووی لەشکریی؛ لە جیاتی ئەوەی فاکتەری دیمۆکراسی و ئازادی تێکوشانی سیاسی و یەکخەری هێز و وزەی نەتەوەیی و نیشتمانیی و دەرفەت خوڵقێن بێت؛ بووەتە دەرفەت سووتێن و هەڕەشە خوڵقێن و پڕش و بڵاویی هێز؛

٥- پرش و بڵاویی پارت و لایەنە سیاسییەکان و نەبوونی پلان و سیاسەت و ستراتیژی هاوبەشی کوردستانیی، فاکتەرێکی دیاری لاوازیی ڕۆڵ و پێگەی سیاسەتی کوردستانییە لە حاند ئۆپۆزیسیۆنی فاشیستی فارس. هاوکات دۆخێکی لەبار و ڕاکێشەر نییە بۆ پێکهێنانی هاوپەیمانییەکی بەرین و بەهێز لە گەڵ پارت و ڕێکخراوە سیاسییەکانی نەتەوە بندەستەکانی دیکەی جوغرافیای ئێران. هەروەها ئەو خاڵە لاوازەیە کە بووەتە لەمپەڕ لە ڕێگای دیپلۆماسیی نەتەوەیی و ڕاکێشانی پشتیوانیی نێودەوڵەتی لە دۆزی کوردستان؛

بۆیە بە سەرنجدان بە دۆخی ئارایی و ئەو فاکتەرانە: 
۱- پێکهێنانی بەرەیەکی یەکگرتووی کوردستانی لە نێوان پارت و رێکخراوە سیاسییەکان، بە بەشداریی و رۆڵگێڕانی کەسایەتییە سەربەخۆکان و کۆمەڵگای مەدەنیی رۆژهەڵاتی کوردستان لە سەر بنەما و لە پێناو مافی دیاریی کردنی چارەنووسیی سیاسیی رۆژهەڵاتی کوردستان لە ڕێفراندۆمێکی ئازاد و گشتییدا،گرینگترین و لە پێشترین پێویستی و هەنگاوی سیاسییە بۆ سەرکەوتنی ڕاپەڕینی ژینا و ڕەواندنەوەی دڵەڕاوکێی و نیگەرانییەکان و بنیاتنانی داهاتوویەکی پرشنگدار .
۲- پارتی ئازادیی کوردستان خۆی، هەر لە ساڵی ٢٧٠٣(٢٠٠٣)ەوە، خاوەنی پڕۆژە بووە بۆ دامەزراندنی بەرەی کوردستانی و ئەرکەکانی لە قۆناغی خەباتی رزگارییخوازیی و قۆناغی سەرکەوتن و ڕاماڵینی دوژمنی داگیرکەردا. هەروەها پڕۆژەی تایبەتی هەر کام لە حیزب و لایەنەکانی دیکە لەسەر پرسی هاوکاریی، بە بایەخەوە دەبینێ؛ بەڵام هەم بە هۆی ڕێژەیەکی بەرزی کۆدەنگیی حیزب و رێکخراوە سیاسییەکان لە بانگەوازی پۆلێک کەسایەتی بۆ «یەکێتی و یەکڕیزیی حیزب و رێکخراوە سیاسییەکانی رۆژهەڵاتی کوردستان»کە لە 5/10/2022دا بە واژۆی نزیکەی 1000تاکی کورد،بڵاو کرایەوە و هەم بۆ بایەخدانان و بەهێند گرتنی دەور و تێکۆشانی کەسایەتییە سەربەخۆکان و دیتنیان وەک ئاکتەرێکی بەشدار لە بزاڤی سیاسیی کوردستاندا؛ لای خۆیەوە ئەو بانگەوازە وەک بنەمایەک بۆ رێککەوتنی پارت و لایەنە سیاسییەکان بۆ هاوکاری و دامەزراندنی بەرەی کوردستانی لە پێناو وەدیهێنان و کردەیی کردنی مافی دیاریی کردنی چارەنووسی سیاسی رۆژهەڵاتی کوردستان و ژیان و تێکۆشان لە کوردستانی ڕزگارکراودا، دادەنێ.
٣- بەم پێیە پارتی ئازادیی کوردستان ئامادەیە ئەو بانگەوازە و (بنەماکانی ڕێککەوتن) و «هەنگاوە پراکتیکەکان» ی، وەک بەڵگەی ڕێکخستنی پێوەندیی و هاوکاریی نێوان پارت و ڕێکخراوە سیاسییەکان و پێکهێنانی بەرەیەکی کوردستانی و هەڵسوکەوتی سیاسیی لەمڕۆ و پاشەڕۆژی کوردستاندا، بە بنەما و بناغە بگرێت و بێ هیچ شەرت و مەرجێک لە گەڵ هەموو ئەو پارت و رێکخراوە سیاسییانەی پەسندیان کردوە و پشتیوانییان لێ دەربڕیوە، هاوکاریی دامەزراوەیی بکات. 

پارتی ئازادیی کوردستانPAK
مەجلیسی گشتیی

٢٥ی گوڵانی ٢٧٢٣ک
 ١٥ی مای ٢٠٢٣ز