پەیامی سەرۆکیPAK، فەرماندەی سپای میللیی کوردستان بۆ کۆچی دوایی ھونەرمەند تاھیر خەلیلی:

26/11/2023

پەیامی سەرۆکیPAK، فەرماندەی سپای میللیی کوردستان بۆ کۆچی دوایی ھونەرمەند تاھیر خەلیلی:

بە داخ و کەسەری زۆرەوە، ئەمڕۆ هونەرمەندی ناسراوی کوردستان کاک تاهیر خەلیلی، ماڵاوایی یەکجاریی کرد.
تاهیرخەلیلی دەنگێکی ئاشنای کوردستانیی بوو کە نیشتمان و پێشمەرگە و شەهید و خەم و ئازارەکانی بە دەنگە بەسۆزەکەی ڕادەژاند و هێزی ئەژنۆی بە لاوانی نیشتمان بۆ خەبات لە پێناو سەربەخۆییدا دەبەخشی. ئەو ٤٠ ساڵی ڕابردووی تەمەنی لە پێشمەرگایەتیی، ئاوارەیی و غەریبی بردە سەر.
 تاهیر ئەگەر چی خەونی بە گەڕانەوە بۆ بۆکان و حەوزە گەورە و تەرغەوە دەبینی بەڵام ئامادە نەبوو بە داگیرکراویی بیانبینێتەوە و چاوی لە ڕۆژی هەڵتەکاندنی سەروەریی و ڕادانی داگیرکەری ئێرانیی لە زێد و نیشتمانەکەی بوو. هەر بۆیە لە کۆڕی ڕۆڵە ئازاکانی نیشتمان پێشمەرگەکانی کوردستان دانەدەبڕا.لە ماوەی ساڵانی شەڕی داعش و بەرەنگار بوونەوەی حەشد و پاسداری ئێران لە بەرەکانی جەنگ لە باشووری نیشتمان، سەری دەداین، دڵگەرمیی پێدەداین و گۆرانیی و سروودی بۆ سەربەخۆیی کوردستان دەچڕی.
ئەگەر چی تاهیر ڕۆیی و بە ئاوات نەگەیشت بەڵام وەڵامەکەی لە«قەندیلی سەربەرزەوە»،«ئەی دایکی نیشتمان قەدری بزانە»،پەیامەکەی بۆ «ڕۆژی سەربەخۆیی کوردستان»،«دڵنیاییەکەی بە نەتوانەوەی کورد»و «هاوارە بەرزەکەی یا مەرگ یا کوردستان»ی نەمر و هەرمانی دەکات.
 سەرەخۆشیی بێ لە کوردستان، لە کۆمەڵگای هونەرمەندانی کورد، لە خاو و خێزان و هاوڕێ و دۆستانی. سەبووری بۆ هەمووان و دلۆڤانیی خوای گەورە بۆ تاهیری بە مراد نەگەیشتوو.

حسەین یەزدانپەنا

٥ی سەرماوەزی ٢٧٢٣ک
٢٦ی نوامبری ٢٠٢٣ز