21/01/2024

 

ئێوارەی رۆژی هەینی ٢٩ی بەفرانباری ٢٧٢٣ک، کچە خوێندکارێکی تەمەن ٢٠ ساڵانی خەڵکی کۆیەشتی رۆژهەڵاتی کوردستان بە ناوی " ئاناهیتا ئەمیرپوور" لە بروجێرد ی سەربە پارێزگای لوڕستانی رۆژهەڵاتی کوردستان بە تەقەی راستەوخۆی هێزەکانی دەوڵەتی داگیرکەری ئێران کوژرا.
هێزەکانی سەربە ئیدارەی ئیتلاعاتی دەوڵەتی داگیرکەر لە ناوچەی نیزامابادی بروجێرد، تەقە لە دووسەرنشینی ئۆتۆمبێلێک دەکەن و لە ئاکامدا ئاناهیتا ئەمیرپوور خوێندکاری بەشی وەرزشیی زانکۆی ئازادی بروجێرد کوژرا و شۆفێرەکە بەسەختی بریندار کرا.
جێگای ئاماژەیە تاران گوشاری خستووەتەسەر بنەماڵەی ئاناهیتا ئەمیرپوور کە هیچ شتێک لەسەر ئەم تاوانە نەدرکێنن.
هێرش، پەلامار، گرتن و کوشتنی رۆڵەکانی رۆژهەڵات بە بیانوو و پاساوی جۆراوجۆرەوە لە سیناریۆوە نەپساو و بێ‌دواییەکانی دەوڵەتی داگیرکەری ئێرانە؛ و تاکە رێگای رزگاریی لە گێژاوی سیناریۆ و تاوانە جیاجیاکانی ئەو دەوڵەتە، هەڵتەکاندنی نیزامی کۆلۆنیالیستیی ئێران و دامەزراندنی دەوڵەتی نەتەوەیی کوردستانە.