حوکمی لەسێدارەدانی محەممەد قوبادلوو جێبەجێ‌کرا

23/01/2024

ئەمڕۆ سێ شەممە ٣ی رێبەندانی٢٧٢٣ک، یەکێ لە بەشدارانی بزووتنەی ژینا کە پێشتر دەسبەسەرکرابوو و لەلایان دادگا نادادەکانی دەوڵەتی داگیرکرەوە حوکمی ئیعدامی بەسەرداسەپابوو، حوکمەکەی جێبەجێ‌کرا.
محەممەد قوبادلوو تەمەن ٢٣ ساڵان، دانیشتووی تاران سەرەڕای ناجێگیربوونی دۆخی دەروونیی؛ ئەمڕۆ لە بەندیخانەی قزڵحەساری شاری کەرەج حوکمی لەسێدارەدانەکەی جێبەجێ‌کرا. هەرچەند پێشتر "مەعسوومە ئەحمەدی" دایکی ناوبراو بە بڵاوکردنەوەی گرتەڤییدۆییەک و خستنەڕووی بەڵگە نیشانیدابوو کوڕەکەی پێشتر تووشی نەخۆشیی دەروونییی "دوو قوتبی" بووە و لەکاتی راپەڕین‌دا دەرمانەکانی نەخواردووە.
محەممەد قوبادلوو لەکاتی راپەڕینی ژینا بە ئۆتۆمبێل خۆی دەکێشێت بە ژمارەیەک لە هێزەکانی بەرفەرمانی تاران و لەئاکامدا یەکێ لە هێزەکانی ئێران بەناوی "فەرید کەرەمپوور" دەکوژێ.
جێگای ئاماژەپێدانە حوکمی ناوبراو بە پێی بڕیاری لقی ١ی دادگای ئێرانەوە هەڵوەشابووەوە، و سەرەڕای بڕیاری هەڵوەشاندنەوەی حوکمەکەی بەرەبەیانی ئەمڕۆ ئیعدام کرا.