​ P K K هەڵوەشانەوە و گۆڕینی ناو و ستراتیژی یان وازهێنان لە هەموو جۆرە چالاکییەکی سیاسی و ڕێکخراوەیی!

14/05/2025

سەدیق دەروێشی

 🔶  کۆنگرە هەژمار ١٢ی پارتی کرێکارانی کوردستان بڕیاری هەڵوەشاندنەوەی ئەو پارتە و وازهێنانی لە چالاکیی چەکداری داوە. ئەوە واتە کۆتایی قۆناخێک لە مێژوو و دەستپێکردنی قۆناخێکی نوێ لە چاخێکی هەستیاری ناوچەیی و جیهانیدا. ئەو هەنگاوەی پارتی کرێکارانی کوردستان جێی تێڕامان و لێوربوونەوەیە و پرسیارگەلێک دەورووژێنێ، 
-ئەو هێزە سیاسییە، بۆ تێکۆشانی داهاتووی ، دەیەوێ چ ڕێیەک بگرێتە بەر؟ 
-ناوی چ دەبێ ؟ 
-چوار چێوە و سنوورەکانی تێکۆشانی چۆن دیزاین دەکا؟ 
-چ ستراتیژییەک هەڵدەبژێرێ؟  
  
    🔷ئەگەر هەوڵوەشاندنەوەی ناو و نیشانی پ ک ک بە مەبەستی گۆڕینی ناو و ، چەک دانان له پێناو  هەڵبژاردنی خەباتی سیاسی و پارلمانی و ، گۆڕینی ستراتیژی ، بۆ وازهێنان و دوورکەوتنەوە لە بیر و هرزی مارکسیستی و گرتنەبەری ڕێچکە و ڕێبازێکی نەتەوەیی و ناسیونالیستی بێ ، ئەوە دەکرێ بڵێین هەڵوەشاندنەوە تەنیا گۆڕینێکە و نوێ بوونەوە و سەردەمیانە بوون و مۆدێڕنیزەکردنی ستراکچێر و هزر و ئاوەزی سیاسی و ڕێکخراوەییە و قازانجیشی بە دواوەیە؛ پ ک ک لە لیستی تیرۆریستی وڵاتاندایە و لە باکووری کوردستانیش ناتوانێ بەو ناوە تێکۆشانی سیاسی و پارلمانی بکا ، ئەرتەش و هێزە ئەمنییەکانی تورکیش ئیدی بیانوویان بۆ میلیتاریزە کردنی باکوور و باشووری کوردستانیان نامێنێ و کۆتایی بە ئەتموسفۆری ئەمنی و پۆلیسی نێو کۆمەڵگای باکووری کوردستان دێ و دەرەتان بۆ بزاڤی سیاسی والاتر دەبێ و کورد دەتوانێ پرسی خۆی بەرێتە نێو پارلمانی تورکیا و چارەسەرێکی سیاسییانەی بۆ ببینێتەوە. هەڵبەت ، ئەگەر پ ک ک دوای هەڵوەشاندنەوی ، ناو و نیشانێکی کوردستانی بۆ ڕێکخراوی دوای پ ک ک هەڵبژێرێ و هەڵگری بێ.

🔶 ئەگەر ، پ ک ک دوای هەڵوەشاندنەوەکەی خۆی وچەک دانان، وەک هێز و لایەنێکی تورکیایی دەربکەوێ و چوارچێوە و پانتایی جۆغرافیایی تێکۆشانی هەموو تورکیە بگرێتەوە بۆ وێنە: ناوی بنێ " پارتی دێمۆکراسیی تورکییە" ، ئەوە کۆتایی هرزە نیوەچڵە  ناسیونالیستییەکەی پ ک ک  و تەنانەت شوناسی کوردانەکەشی دەبێ و ئیدی بە تەواوی واز له شوناسی کوردی و کوردستانی بوونی خۆیان دێنن. ئا لێرەدایە کە دەکرێ ناوی ئەوە بنێین درەئەنجامی  " کوالیسیۆنی پ ک ک و هەڵگرانی هزری پانتورانیزمی گورگە بۆرەکان"بە دژی هزری ناسیونالیستیی کورد لە باکووری کوردستان.
  لە وەها دۆخێکدا ،پرسیارگەلێکی گرینگ قووت دەبێتەوە و دەبێتە ختوورەی مێشکی تاکی ناسیونالیستی کورد. ئەویش ئەوەیە:
- داخوا پ ک ک بۆ لەبار بردنی هزری ناسیونالستیی کورد لە باکووری کوردستان دامەزرا یان دامەزرێندرا؟
 - هەڵوەشاندنەوەی پ ک ک نیشانەی کۆتایی ئەرکە پێئەسپێردراوە ئاماژە پێکراوە بووە؟
- داخوا ، لەمەو دواش ئەرکی، پێشگیری لە بێچمگرتنی هزری ناسیونالیستیی کورد لە باکووری کوردستان دەبێ؟
- ئەو هەموو خوێنە ڕژاوەی ڕۆڵە فیداکارەکانی کورد و شەهید بوونی بە هەزارانیان ، لە پێناو سڕینەوەی هزری ناسیونالیستی کورد بووە داخوا؟ 
  هیوادارم ئەو هەگەرە ڕاست نەبێ و ڕێکخراوی دوای هەڵوەشاندنەوەی  پ ک ک ، هەڵگری شوناسی نەتەوەیی کورد بێ و ببێتە ئاڵاهەڵگری ئەو هزرە و ئاوەز و ڕێچکە و ڕێبازە لە باکووری کوردستان و دەورێکی ئەرێنیی لە بەرەوە پێشبردنی دۆزی کوردا بگێڕێ.

🔶 ئەگەر هەڵوەشاندنەوەی پ ک ک و چەک دانان بە مانای کۆتایی هەموو جۆرەکانی خەبات و نیشانەی ماندوویی خەباتکاران بێ ، ئەوەش یانی بە چۆکداهاتن و ئاشبەتاڵی و ڕۆژە ڕەشی و نەهامەتی و ڕەنج بە خەساری . واتە ، کولێکسیۆنی کادری ڕێبەری پ ک ک تەنیا دەیەوێ مەجالی ژیانیان پێ بدرێ و ئەولەهیی تاکەسییان بپارێزرێ و بتوانن ئەو تەمەنەی ماویانە وەک مرۆڤێکی ئاسایی ژیانی خۆیان ، بە بێ گرفتی دادوەری و ئەولەهی ، تپەڕێنن.
   لە هەگەری دۆخێکی ئاوا دا، ڕایەدارانی پ ک ک و کەسی یەکەمیان دەکەونە بە ڕەخنەیەکی زۆر و بەرپرسیارەتییەکی زۆرەوە و دەبێ وەڵامدەر بن و تەنانەت دەکرێ سکاڵاشیان بە دژی تۆمار بکرێ و لێپرسینەوەیان لێ بکرێ. 
   هیوادارم نە پ ک ک و نە هیچ لایەنێکی دیکەی کوردی بکەوێتە ئەو دۆخەوە و تووشی وا نەهیلیزمێکی ئاوەزی و هزری و سیاسی بێ.

🔷 ئێمە هەموومان دەزانین ناوچەکەمان و بگرە جیهانیش لە بەردەم تاقیکردنەوەیەکی نوێی دیکە دایە و ؛ ئەو ترانسەیشن و قوناخە تێپەڕە بەرەو چاخێکی نوێ هەنگاو دەنێ کە گۆڕانکاریی ژێئۆپۆلیتیکی و سیاسی و نێوخۆیی کۆمەڵگاکان و دەوڵەتان  و زال بوونی پارادایمی نوێ لە پێوەندییە نێودەوڵەتی و نێونەتەوەییدا بە دوای خۆیدا دێنێ. 
  لە قوناخی تێپەڕ بەرەو قوناخی جێگیر ، بەهێزەکان  لە هاوکێشە ناوچەیی و جیهانییەکان سەردەکەون و براوە دەبن و ڕەوتی گۆڕانکارییە جۆراوجۆرکان بە قازانجیان دەشکێتەوە. یاسا و ڕێسا و نۆرم و بەها و پاردایمە زالە نوێیەکان لە لایەن براوەکانەوە دادەڕێژرێ و ، مێژوو لە لایەن براوەکانەوە دەنووسرێ  ، چونکە مێژوو ئی براوەکانە و لاوازە دۆڕاوەکان لە تاریکستانی مێژوودا ون و بزر دەبن و لە بیر دەکرێن.

  🔶  هێز و لایەنە سیاسییەکانی کورد پێویستە خۆیان ئاپدێت بکەنەوە و ڕەوتی نوێگەرایی بگرنە بەر و ، هەستی ناسیونالیستی کورد بە عەقڵانییەتی سەردەم بخەملێننەوە و هێزێکی نوێی پێ ببەخشن و کوردبوون نەکەن بە قوربانیی هرز و ئیدئۆلۆژییە جیهانی و ناوچەییەکان. ئەوەمان لە بیر بێ کە ئیدئۆلۆژییەکان تەنیا و تەنیا خزمەتگوزاری نەتەوە باڵادەستەکان و بۆ دەستەمۆ کردن و بگرە هەڵخەڵەتاندنی ئەوانی دیکەی جیا لە خۆیان بووە.

  🔷 ئێستا ، چاخی بەچۆکداهاتن و ماندوو بوون و وازهێنان نییە و ؛  سەردەمی ئەکتیڤ بوون و نوێ بوونەوە و بەهێز بوون و پێداگرییە لە سەر شوناس و دۆزی نەتەوەیی و ڕزگاری و ئاوەدانی نیشتمان. ئێستا سەردەمی یەکگرتن و یەکانگیر بوونی نەتەوەیی و نیشتمانییە. لە بیرمان بێ ، تەنیا کورد دەتوانێ بۆ خۆی چارەی پرسی خۆی بکا و دواجار براوە بێ. 
   هیوادارم ، هەڵوەشاندنەوەی پ ک ک و گۆڕینی جۆری خەبات لە چەکدارییەوە  بۆ خەباتی سیاسی ، لە پێناو دۆزی نەتەوەیی و سەرخستن و بە ئەنجام گەیاندنی ڕەوتی ناسیونالیزمی کورد بێ.