راگەیێندراوی رێکخراوی ئازادیی ژنانی کوردستان _ نینا بۆ مەحکووم‌ کردنی دەسبەسەرکران و ئەشکەنجەدانی ژینا ئەمینی لەلایان هێزەکانی دەوڵەتی فارسەوە

15/09/2022

راگەیێندراوی رێکخراوی ئازادیی ژنانی کوردستان _ نینا بۆ مەحکووم‌ کردنی دەسبەسەرکران و ئەشکەنجەدانی ژینا ئەمینی لەلایان هێزەکانی دەوڵەتی فارسەوە

پاشنیوەڕۆی رۆژی سێشەممە 22 خەرمانان ژینا ئەمینی" مەهسا ئەمینی" 22 ساڵان، خەڵکی شاری سەقزی رۆژهەڵاتی کوردستان لە یەکێک لە شەقامەکانی تاران بە بیانووی رەچاونەکردنی حیجابەوە لەلایان گەشتی ئیرشادی ئەو شارەوە دەسبەسەر دەکرێ و بەهۆی لێدان و ئازارو ئەشکەنجەوە سەری بەسەختی بریندار دەکرێ و تووشی جەڵتەی مێشک دەبێت و دەڕواتە حاڵەتی کۆماوە.
گرتن و لێدان و ئەشکەنجەی رۆڵەکانی کورد لەژێر پاساو و بیانووی جۆراوجۆرەوە درێژەی سیاسەتی داگیرکەرانەی دەوڵەتی فارسە کە سەدەیەکە بۆ لەنێوبردنی رۆڵەکانی ئەم نەتەوەیە گرتوویەبەر و کەڵک لە هەر دەرفەت و بیانووێک وەردەگرێ بۆی.
ئەگەر لە جیهان‌دا پێشێلکردنی مافی ژنان لە ئاکامی سەرەڕۆیی و پابەندنەبوونی پیاوانە بە مافە سروشتییەکانی ژنان؛ ئەوا لە دەوڵەتی داگیرکەری ئێران‌دا زیاد لە چل ساڵە پێشێلکردنی مافەکانی ژن و رێکردنەوە بۆ کوشتن و ئازارو ئەشکەنجەدانیان بە سیستەم و یاسای بنەڕەتی رێکخراوە و ئاسانکاریی بۆ دەکرێ.
رێکخراوی ئازادیی ژنانی کوردستان نینا ئەم رووداوە نامرۆڤانەیە مەحکووم دەکات و پێ لەسەر ئەو راستییە دادەگرێتەوە کە دابین‌کردن و پاراستنی کەرامەت و رەچاو کردنی ماف و سەربەستییەکانی ژنی کورد لە ڕۆژھەڵاتی داگیرکراو، تەنیا لە ڕێی رزگاریی وڵاتەکەمان لەژێردەستەیی وەدی دێت و ئازادی و دابینکرانی سەرجەم مافەکانی ژنان بەستراوە بە رزگاریی نیشتمان و نەتەوەکەمان؛ و بێگومان گەشەکردن و بەختەوەریی نیشتمانمان بەستراوە بە رەچاوکردنی مافەکانی ژنان.

رێکخراوی ئازادیی ژنانی کوردستان _ نینا
24 خەرمانانی 2722
15 سێپتامبەری 2022