🔴پەیامی سەرۆکیPAKبۆ ڕۆڵەکانی ڕۆژھەڵاتی کوردستان: 🔶ڕۆژی دووشەممە مانگرتنی سەرانسەریی بەڕێوەبەرن. 🔷مانگرتن بەس نییە، دەست لە دوژمن و دامەزراوەکانی بوەشێنن.

17/09/2022

رۆڵەکانی نەتەوەی کورد لە رۆژهەڵاتی داگیرکراو!

هەروەک ئاگادارن کوردستان و کورد بە شەهیدکردنی "ژینا ئەمینی" بەدەستی کاربەدەستانی دەوڵەتی داگیرکەری فارس, تووشی غەدر و ستەمێکی دیکەبووە.
شەهیدکرانی کچە لاوی کورد " ژینا ئەمینی" وەبیرهێنەرەوەی شەهیدکرانی " شوانەی سەیدقادر" لە شاری مەهابادە.     لەگەڵ ئەوەدا کە شەهیدکردنی ژینا، ئەستاندنی ناڕەوای گیانی مرۆڤێک و زەوتکردنی مافی ژیانی ئەو کچە لاوەی کوردە، بەڵام بەشێوەیەکی قووڵتر بابەتێکی گشتیی نەتەوەییە و ناتوانێ تەنیا لە ئاستی تاکەکەسی‌دا لێکبدرێتەوە.
ژینا دەگیرێ و دەکوژرێ، نەک تەنیا لەبەر ئەوەی حیجابی رەچاو نەکردووە، بەڵکوو بەر لە حیجاب لەبەر ئەوەی کوردە و کچە کوردێکە؛ بۆیە ئەم تاوان و دەسدرێژییە لە چوارچێوەی پێوەندیی نێوان دەوڵەتی داگیرکەری فارس و کوردستانی داگیرکراودا لێکدەدرێتەوە؛ ئەوان بەو تاوانە جارێکی‌تر دەسدرێژییان کردووەتەسەر ماف و خاک و خەڵک و ئاسایش و ئازادیی نەتەوەی کورد لە رۆژهەڵاتی داگیرکراو. هەر بەوپێیەش رۆڵەکانی نەتەوەی کورد لە رۆژهەڵاتی داگیرکراو و بگرە لە هەموو کوردستانی مەزن لەسەریانە ئەم رووداوە بە هی خۆیان بزانن و هەرکەس لای خۆیەوە وەک پرسێکی نەتەوەیی خاوەندارێتیی لێ‌بکات.
قاتڵی ئەسڵیی ژینا دەوڵەتی داگیرکەری فارسە و لە بەرانبەردا قازی و دادگای رەوا لەم کەیسەدا خەڵکی کوردستان بۆ خۆتانن و تەنیا لەڕێی هەنگاو هەڵگرتنەوە و هەڵوێست‌دەربڕینێکی یەکگرتووانە دەتوانن حوکم لەسەر ئەم تاوان و جینایەتە بدەن. هەروەکوو لەکاتی شەهیدکرانی شوانەی سەیدقادردا بۆ ماوەی 40 رۆژ هەموو کوردستان هەستایە سەرپێ و راپەڕینێکی سەرانسەریی کوردستانیی چووە لاپەڕەکانی مێژووەوە؛ داوا لە هەموو دانیشتوانی کوردستانی خۆشەویست دەکەم شاری سەقز و بنەماڵەی شەهید ژینا بەتەنیا بەجێ نەهێڵن و وەک هەنگاوی سەرەتایی رۆژی دووشەممە کە هاوکاتیشە لەگەڵ 31 ساڵەی تێرۆری رچەشکێنی رێبازی سەربەخۆیی کوردستان "  کاک سەعید یەزدانپەنا" لە مانگرتنێکی گشتیی و یەکگرتوو و سەرانسەریی‌دا دەوڵەتی داگیرکەر وەک قاتڵی ژینا و وەک دوژمنی خاک و خەڵک و دانیشتوان و ژینگەی نیشتمانەکەمان مەحکووم بکەن.
چاوەڕوانیی لەوەی دەزگای قەزایی دەوڵەتی داگیرکەر بە هانای مافی زەوتکراوی ژینا و بنەماڵەی ژینا و مرۆڤێکی کوردەوە بێت، چاوەڕوانییەکی لە جێی‌خۆیدا نییە؛ بەڵکوو دەتوانێ وەک بەلاڕێ‌دا بردنی کەیسەکە دوژمن کەڵکی لێ‌وەرگرێت. هەڵبەت وەڵامدانەوە بە تاوان و جینایەتەکانی تاران تەنیا بە مانگرتن بەس نییە؛ کاتی ئەوە هاتووە لە بەرانبەر کوژرانی رۆژانەی رۆڵەکانی نەتەوەکەماندا لە سنوورەکان و لەسەر شەقامەکان و لەنێو زیندانەکان، لاوانی کوردستان چ لەسەر خاکی کوردستان و چ لە ماڵی دوژمن‌دا لەهەر کوێ بۆیان کرا و بەهەر ڕادە توانییان، دوژمنی داگیرکەر و دامەزراوەکانی بەر هەڵمەتی  خۆیان بدەن و تۆڵەی خوێنی بە ناحەق‌ڕژاوی خوشک و براکانیان بکەنەوە.
لێرەوە سڵاو دەنێرم بۆ رۆحی پاکی ژینای شەهید و هاودەردیی لەگەڵ بنەماڵە غەدرلێ‌کراوەکەی دەردەبڕم و سڵاو رێز و وەفای خەباتگێڕانە بۆ دانیشتووانی شاری سەقز دەنێرم کە ئەمڕۆ بە حەشیمەتێکی زۆر تەرمی ژینای شەهیدیان بەخاک سپارد و 
هەر ئێستاش لاوانی شاری سەقز لەسەر شەقامەکانن و بە دروشم‌دان و بە خۆپیشاندان ئەو تاوانە مەحکووم دەکەن و لەسەر کوردبوون و ناسنامەی کوردستانیی خۆیان و مافی ژیان و سەروەریی و ئازادیی کوردستان خۆپێشاندان دەکەن.

حسەین یەزدانپەنا
٢٦ی خەرمانانی ٢٧٢٢ ک
١٧ی سێپتامبری ٢٠٢٢ ز